"Duhet t’i tregojmë Evropës se ne shqiptarët jemi shumë moti në Evropë dhe kemi traditë të madhe"

“Duhet t’i tregojmë Evropës se ne shqiptarët jemi shumë moti në Evropë dhe kemi traditë të madhe”

Kampioni i Kosovës në futboll, Feronikeli nesër do ta zhvillojë ndeshjen kthyese ndaj kampionit sllovak, Slovan Bratislava. Te klubi nga Drenasi në konferencën e mbajtur para ndeshjes u pa një motivim i madh për fitore në ditën e nesërme.

Trajneri Zekirija Ramadani tha se skuadra është përgatitur maksimalisht për këtë ndeshje dhe duke parë edhe rezultatin e ndeshjes së parë, Nikli ka shanset e veta për një kualifikim të mundshëm në raundin tjetër.

“Do të hymë njëjtë si në ndeshjen e parë. Do të sulmojmë me mendje dhe do të mbrohemi me dije. E kemi përballë një superskuadër, e cila provon më shumë në kundërsulme. Nuk do të ketë ndryshime të mëdha në formacion, besoj qe do të ketë një apo dy ndryshime jo më shumë. Për ta mposhtur këtë skuadër duhet të vrapojmë më shumë se me ata, duhet të luftojmë më shumë se ata. Taktikisht do të jemi njëjtë si në ndeshjen e parë. Ne motivohemi vetëm në aspektin sportiv. Ato fyerjet që ndodhën në Sllovaki, besoj që futbollistët e mi as nuk i kanë dëgjuar, pasi që janë maksimalisht të fokusuar në ndeshje. Duhet t’i tregojmë Evropës se ne shqiptarët jemi shumë moti në Evropë dhe kemi traditë të madhe, andaj ftoj tifozët që të vinë në numër sa më të madh dhe të i duartorokasim në fund të dy skuadrat”, tha Ramadani.

Edhe mbrojtësi i majtë i Niklit, Ylli Hoxha u shpreh se kampioni i Kosovës do të mundohet me të gjitha forcat që të arrijë një kualifikim historik në raundin tjetër te kualifikimeve të Europa League.

“Në çdo ndeshje kemi nevojë për tifozë. Besoj që do të mbushet stadiumi, duke parë edhe faktin se kemi përballë një kundërshtar të fortë. Do të mundohem ta jap maksimumin në këtë ndeshje, besoj që kemi forcë për kualifikim tutje, pasi që kemi lojtar shumë kualitativ në skuadër”, tha Hoxha.

Ndërsa, sulmuesi i krahut të Niklit, Astrit Fazliu pohoi se skuadra e tij shpreson ta ketë edhe fatin me vete, pasi në dy ndeshjet e fundit kjo i ka munguar atyre.

“Normal pres fitoren por është e vështirë. Slovan Bratislava ka një skuadër shumë të fortë. Neve na mbetet të fokusohemi në fushë dhe ti kryejmë detyrat tonë në përpikëri. Shpresoj që të kemi përkrahje maksimale nga tifozët në këtë ndeshje por shpresoj që të kemi më shumë fat se hera tjerave”, tha Fazliu.

Ndeshja e kthimit ndërmjet ‘Niklit’ dhe Slovan Bratislavës do të zhvillohet nesër me fillim nga ora 18:00. Në duelin e parë, ekipi nga Drenasi ka pësuar humbje, me rezultat 1:2.