Në Kosovë zbulohet obelisku kushtuar viktimave të 11 shtatorit

Në Kosovë zbulohet obelisku kushtuar viktimave të 11 shtatorit

Shtetet e Bashkuara, por edhe mbarë bota përkujtojnë sot 18-vjetorin e sulmeve të përgjakshme të 11 shtatorit 2001. Sulmi ndaj kullave binjake ishte kryer me 11 shtator 2001 nga një grup prej 19 vetash rrëmbyesë radikalë, 15 prej të cilëve ishin nga Arabia Saudite, dy nga Emiratet e Bashkuara Arabe, një nga Egjipti dhe një nga Libani.

Fillimisht njëri aeroplan i rrëmbyer ishte përplasur mbi kullën veriore të Qendrës Botërore të Tregtisë në Nju Jork, duke krijuar një çarje të thellë në faqen e ndërtesës dhe duke shkaktuar zjarr, kurse 17 minuta më vonë një aeroplan tjetër pasagjerësh përplaset mbi kullën jugore.

Në sulmin e 11 shtatorit 2001 humbën jetën rreth 3 mijë persona. Në mesin e viktimave në kullat binjake ishin 2 mijë e 752 persona prej tyre 343 zjarrfikës dhe 60 policë. Pjesa më e madhe e viktimave ishin civilë të 70 kombësive të ndryshme.

Ceremonitë në Nju Jork dhe Uashington do të nisin me një minutë heshtje, në kohën kur ndodhën sulmet.

Ekspertët shprehen se 11 shtatori 2001, ndryshoi shumë gjëra në botë. Këto ngjarje u bënë shkak për nisjen e një fushate të gjerë të udhëhequr nga SHBA-të kundër terrorizmit.

Në 18-vjetorin e kësaj ngjarje, Kosova e kujton këtë ditë të kobshme për SHBA-të dhe gjithë demokracinë botërore. Kryeministri në largim Ramush Haradinaj, do të zbulojë obeliskun kushtuar viktimave të 11 shtatorit. Ky obelisk prej sot do të jetë në oborrin e Qeverisë së Kosovës në nderim të rreth 3 mijë viktimave të sulmeve terroriste të 11 shtatorit 2011 në SHBA. Obelisku ka mbishkrimin “Kosovo Remember” ose në shqip “Kosova Kujton” në katër faqet e saj ku shkruhen edhe ndërtesat të cilat janë sulmuar. Po ashtu, do të jetë edhe logoja e Qeverisë së Kosovës. Obelisku do të zbulohet sot me një ceremoni të veçantë me pjesëmarrjen e krerëve më të lartë të vendit.

Kurse Shoqata “Miqtë e Amerikës” do të organizojë disa aktivitete të cilat fillojnë nga ora 08:15 deri në ora 11:45.