Nga 316 personat që iu kanë bashkangjitur organizatave terroriste, 44 janë femra dhe 28 fëmijë

Nga 316 personat që iu kanë bashkangjitur organizatave terroriste, 44 janë femra dhe 28 fëmijë

Policia e Kosovës ka identifikuar 316 kosovarë ndër ta dy sulmues vetëvrasës, 44 femra dhe 28 fëmijë të cilët kanë udhëtuar jashtë vendit për t’iu bashkuar ISIS-it, al-Nusra dhe Ahrar al-Sham. Kështu u tha në lansimin e raportit vlerësues i perceptimeve mbi radikalizimin në nivel të komunitetit në Kosovë, i cili u përgatit me mbështetjen teknike të Programit të Kombeve të Bashkuara për Zhvillim.

Ministri në detyrë i Punëve të Brendshme, Skender Hyseni në fjalën e tij tha se Kosova ka shënuar të arritura të mëdha në luftën kundër ekstremizmit dhe se ky rezultat vjen edhe si rezultat i një bashkëpunimi të ngushtë me organizatat e huaja e në veçanti UNDP-në.

Përfaqësuesja e përhershme e UNDP-së në Kosovë, Alessandra Roccasalvo u shpreh se një çështje e rëndësishme është integrimi në shoqëri i atyre që kthehen në Kosovë pas ikjes për veprime radikale. “Sa i përket riintegrimit, kjo për UNDP-në dhe për Kosovën është një gjë e rëndësishme. Ju mund të parandaloni ikjet, të bëni punë sociale, të bëni avokim publik por çfarë bëni me njerëzit të cilët kthehen? Në këtë studim, 63% e të anketuarve thonë se do të ndiheshin në rrezik dhe jo të sigurtë dhe do të hezitonin të socializoheshin. Pra, këto janë rastet të cilat i kemi parë në Kosovë. Kur njerëzit kthehen në Kosovë ata mundohen që të socializohen por askush nuk i do ata”, u shpreh ajo.

Në këtë prezantim u konstatua se parandalimi i radikalizimit është sfida më e madhe dhe ajo çka duhet të bëhet në bashkëpunim të të gjithë akerëve së bashku.

Përfaqësuesja e UNDP-së tha se edukimi i të rinjëve ka rëndësi prioritare. “Nuk është një çështje vetëm e ministrisë, policisë apo rendit të ligjit, është një çështje se si ne i edukojmë të rinjtë dhe Kosova ka shumë njerëz të ri. Kjo ka shumë rëndësi, pasi që çdo përmirësim i kualitetit që ne bëjmë sa i përket edukimit do të ketë efekt pozitiv”, shtoi ajo.

Ndryshe, ky hulumtim synon të vlerësojë perceptimet e radikalizimit në nivel të komuniteteve në mbarë Kosovën, rolin e përceptuar të individëve, institucioneve, udhëheqësve, si dhe rolin e përceptuar të ndikimit nga mediat dhe interneti.

Të gjeturat e këtij hulumtimi ndihmojnë në asistimin e hulumtuesve për të prioritizuar rrugët kritike të studimit të mëtejmë dhe udhëzojnë akterët e vendit drejt fushave prioritare strategjike.

http://rtv21.tv/316-kosovare-jane-bashkangjitur-organizatave-terroriste/
Facebook Comment