Procesi i regjistrimit të popullsisë do të bëhet sipas standardeve evropiane

Procesi i regjistrimit të popullsisë do të bëhet sipas standardeve evropiane

Agjencia e Statistikave të Kosovës (ASK) sot ka prezantuar ecurinë e punës për regjistrimin e popullsisë, ekonomisë familjare dhe banesave në vitin 2021.

Kryeshefi Ekzekutiv i Agjencisë së Statistikave të Kosovës, Isa Krasniqi tha se përgatitjet për regjistrim të popullsisë në vitin 2021 kanë filluar qe dy vjet dhe se tani janë në fazën kur kanë edhe koncept-dokumentin që kërkon të aprovohet nga Qeveria e pastaj edhe nga Kuvendi i Kosovës.

Sipas tij, procesi i regjistrimit të popullsisë do bëhet sipas standardeve evropiane dhe do ketë impakt të rëndësishëm për Kosovën. Prandaj në lidhje me këtë Krasniqi kërkoi përkrahjen e të gjitha institucioneve të vendit.

Ndërsa, Drejtori i Statistikave Sociale dhe menaxheri i regjistrimit të popullsisë 2021, Avni Kastrati tha se regjistrimi i popullsisë do bëhet derë më derë përmes metodës ‘Capi’, ku regjistrimi në terren do bëhet për 30 ditë. Sipas tij deri tani kanë përgatitur dokumentet bazike pasi që në vijim përkatësisht në vitin 2020 do ketë intensitet të aktiviteteve.

Regjistrimi i popullsisë, ekonomive familjare dhe banesave në Kosovë ishte realizuar në prill të vitit 2011. Sipas rezultateve të regjistrimit 1.739.825 ishte numri i banorëve që jetonin në territorin e Kosovës, duke përjashtuar komunën e Leposaviqit, Zubin Potokut, Zveçanin dhe pjesën veriore të Mitrovicës.

Para këtij regjistrimi të vitit 2011, regjistrimi më i fundit i vlefshëm në Kosovë ishte realizuar para tri dekadave, në vitin 1981.