AGK e dënon kërcënimin ndaj gazetares
Kërcënimi tashmë është raportuar në polici
Asociacioni i Gazetarëve të Kosovës e ka pranuar me shqetësim informacionin se është kërcënuar gazetarja Salie Osmankaqi dhe ekipi i “Kohës Ditore” në Prishtinë.
“AGK është njoftuar se kolegia Osmankaqi është kërcënuar nga disa persona derisa ajo po raportonte për largimin e banorëve nga banesat e uzurpuara në Dardani”, thuhet në reagim.
“Banorët janë versulur drejt meje mënjëherë dhe iu kemi shmangur sulmit fizik duke hyrë në veturë”, ka deklaruar Osmankaqi.
Kërcënimi tashmë është raportuar në polici, ndërkohë që AGK e dënon këtë rast duke kërkuar hetim të shpejtë.