Për cilën datë simbolike e kishte fjalën Osmani?

Për cilën datë simbolike e kishte fjalën Osmani?

Ndërtimi i pikës kufitare Bellanoc-Stançiç ka përfunduar, por e njëjta ende nuk po hapet për qytetarët.

Punë të kryer e konsideron edhe kreu i BDI-së Ali Ahmeti dhe se tani gjithçka varet nga komunikimi mes Prishtinës, Shkupit dhe përfaqësuesve të BE-së.

I pyetur nga TV21 se cila është pengesa që s’po hapet pika Bellanoc-Stançiq, Ahmeti tha se “janë çështje teknike, nuk ka asnjë problem tjetër“.

Tre javë më parë zëvendëskryeministri Bujar Osmani i tha TV21 se pika kufitare do të hapet në një datë simbolike për shqiptarët.

Do të hapet në një ditë simbolike për popullin shqiptar. Do të ju tregojmë së shpejti”, deklaroi  Osmani.

Tani thotë se kur ka folur për këtë, nuk e ka pasur fjalën për festën e pavarësisë, ndërsa sipas tij pengesat qëndrojnë tek pala kosovare.

Unë nuk e kam përmendur 28 nëntorin. Ne jemi gati sot me nis, por policia kosovare kërkon edhe pak ditë që të organizohet. Vetëm interneti u mungon atyre”, theksoi Osmani.

Ministria e Brendshme e Kosovës, pa treguar hollësi, konfirmon se punimet ende s’kanë përfunduar.

Ende nuk kanë përfunduar punimet për këtë pikë kufitare. Në momentin që të jetë gati do të njoftoheni për kohën e hapjes”, thonë nga MPB e Kosovës.

Opozitarja Aleanca për Shqiptarët i pati dhënë ultimatum qeverisë se nëse deri më 28 nëntor nuk hapet pikëkalimi, do të marshonin dhe kalonin kufirin bashkë me banorët.

Paralajmërojmë se më datë 28 nëntor në rast se nuk bëhet hapja, do të organizojmë marsh simbolik për kalimin e kufirit”, u shpreh Shefik Duraku nga Aleanca për Shqiptarët.

Marshi nga ASH sot nuk u organizua. Nga kjo parti thonë se për shkak të tërmetit në Shqipëri i kanë anuluar të gjitha aktivitetet e parapara./TV21