Ahmeti reagoi pas deklaratës së Daçiqit se pritet tërheqja e njohjes së Kosovës nga një shtet

Sipas Ahmetit, Daçiq po e vazhdon luftën e tij diplomatike

Ministri i Punëve të Jashtme të Serbisë, Ivica Daçiq, ka deklaruar se edhe një shtet pritet ta tërheqë njohjen e Pavarësisë së Kosovës.

Sipas b92, Daçiq ka thënë çnjohja do të ndodhë më 21 janar, ndërsa ka cituar ministrin e Jashtëm rus, Sergei Lavrov t’i ketë thënë dje se për Beogradin është “sukses historik që 12 vende kanë tërhequr njohjen e pavarësisë së Kosovës”.

“Të gjithë e dinë se na kanë kërkuar që t’i suspendojmë aktivitetet tona për gjashtë muaj e ata të na i heqin taksat që na i kanë vënë. A vlen kjo edhe për Amerikën se do të pushojë së lobuari? Në Këshillin e Sigurimit kanë thënë se “i ftojmë të gjitha vendet ta njohin pavarësinë e Kosovës “. Ne s’e kemi pranuar këtë. Nesër i vazhdojmë bisedat e mëtejshme, të hënën mund të pritet që edhe një vend ta tërheqë njohjen”, ka deklaruar Daçiq.

Lidhur me këtë deklaratë të Daçiqit ka reaguar kryesuesi i ekipit negociator, Shpend Ahmeti, i cili ka thënë se si Ivica Daçiq po e vazhdon luftën e tij diplomatike. Ai ka thënë se në këtë frymë, nuk mund të ketë dialog me Serbinë, ndërsa ka ngritur pikëyetjet nëse dikush nga përfaqësuesit e BE-së do të reagojë në lidhje me fushatën agresive të Serbisë ndaj Kosovës.

“Ministri i Punëve të Jashtme i Serbisë, Ivica Daçiqi vazhdon luftën e tij diplomatike në përpjekje për t’i tërhequr njohjet e Kosovës, ka paralajmëruar edhe një ç’njohje për të hënën, duke shtuar se Serbia e ndalë fushatën agresive, atëherë kur SHBA e ndalë lobimin për Kosovën. Në të njejtën kohë, nuk po ndalet presioni nga Brukseli për heqjen e taksës, sepse nuk qenka në frymën e dialogut. Si na qenka kjo fushatë e Serbisë në frymën e dialogut? A do të ketë deklarata nga Brukseli sot? A do të ketë vizitë urgjente nga Hahni në Beograd? Taksa është vendim i Qeverisë, por në këtë lojë të Serbisë, nuk ka as kushte elementare për heqje të taksës, apo dialog.”, ka shkruar Ahmeti në Facebook.

Kryeministri i vendit, Ramush Haradinaj, gjatë një tubimi me strukturat e partisë së tij në Mitrovicë ka deklaruar se për çështjen e taksës ndaj produkteve të Serbisë kanë përkrahjen popullore.

Back to top button