Aktivistë nga Drenasi-Hahn-it: Të duhet viza për të hyrë në Kosovë
Aktivistë nga Drenasi kanë vendosur një baner me porosi për vizitën e Johannes Hahn
Aktivistë nga Drenasi janë mbledhur tek hyrja e ndërtesës së BE-së për të shprehur indinjatën karshi kësaj të fundit për mos liberalizmin e vizave. Ata kanë vendosur një baner me porosi për vizitën e komisionarit evropian për Zgjerim, Johannes Hahn.
“Mirëserdhe në Kosovë z Hahn! Ne jemi për reciprocitet, kështu që u duhet viza që të hyni në Kosovë. Për një vizë, u duhen 45 dokumente të ndryshme dhe 35 euro.(Hiqni vizat)”, ishte kjo porosia për komisionarin evropian, i cili pritet që sot të qëndroj për vizitë në Kosovë.
Aktivisti nga Drenasi, Xhavit Drenori tha se kanë ardhur për të dhënë këtë porosi për komisionarin evropian dhe për te shprehur indinjatën ndaj BE-së për qasjen karshi qytetarëve të Kosovës, të cilët po vazhdojnë të jenë të izoluar dhe pa liberalizim të vizave. Sipas tij, për gjendjen në Kosovë, fajtor nuk është vetëm politika vendore, por edhe vetë BE-ja e cila e ka ndihmuar formimin e shtetit të Kosovës.
“Nëse ata mendojnë se elita jonë politike është e korruptuar atëherë të mos bashkëpunojnë me ta, por mos t’i lënë qytetarët të izoluar”, tha ai.
Fokusi kryesor i vizitës do të jetë në vendimin e Qeverisë së Kosovës për vendosjen e taksës 100 përqind për mallrat nga Serbia dhe Bosnja e Hercegovina. Ai gjatë vizitës pritet ta përsërisë thirrjen për revokimin e taksës dhe të nënvizojë nevojën për fokusim në përmirësimin e marrëdhënieve fqinjësore dhe bashkëpunimin rajonal.