Prokuroria kërkon caktimin e masës së paraburgimit

Prokuroria kërkon caktimin e masës së paraburgimit

Me urdhër të Prokurorit të Shtetit, Policia e Kosovës ka arrestuar katër persona me inicialet A.Sh., A.Ç., D.D dhe A.Ç., të cilët dyshohen se kanë kryer veprat penale, “Asgjësimi i dokumenteve të votimit” dhe “Dhënia ose marrja e ryshfetit në lidhje me votimin” , në fshatin Runik të Skënderajt.

“I arrestuari me inicialet A.Sh., kryesues i vendvotimit, dyshohet se ka kryer dy vepra penale “Asgjësimi i dokumenteve të votimit” dhe “Dhënia ose marrja e ryshfetit në lidhje me votimin”. Ndërkaq, të arrestuarit tjerë me inicialet A.Ç., vëzhgues, D.D., qytetar dhe A.Ç., anëtar i një subjekti politik, dyshohen se kanë kryer veprën penale “Asgjësimi i dokumenteve të votimit” nga neni 217 i KPRK-së”, thuhet në komunikatën e zyres së Prokurorit të Shtetit.

Prokurori i Shtetit për katër të arrestuarit do të kërkojë caktimin e masës së paraburgimit.

Procesi zgjedhor në Kosovë është përcjellë me disa parregullsi sidomos gjatë fazës së numërimit të votave, atyre me vonesë nga diaspora si dhe pjesa e administrimit teknik gjatë ditës së zgjedhjeve./21Media