Të dyshuarit kanë pranuar në tërësi veprën e kryer

Të dyshuarit kanë pranuar në tërësi veprën e kryer

Një vjedhje e rëndë ka ndodhur në fshatin Sazli të Ferizajt, ku një grup prej pesë personash në një shtëpi më 3 nëntor kanë vjedhur 36 mijë euro dhe stoli ari në vlerë prej 8 mijë eurosh.

Pas hetimeve intensive, hetuesit policor të sektorit rajonal të hetimeve Ferizaj, kanë arritur që të identifikojnë pesë persona të dyshuar për kryerjen e veprës penale të “Vjedhjes së rëndë”.

Hetuesit policor gjatë zhvillimit të procedurës hetimore, kanë siguruar prova të mjaftueshme lidhur me kryerjen e kësaj vepre penale, shkruan rtv21.tv.

“Të dyshuarit, A.XH. (m/sh/k 19 vjeç), A.M. (m/sh/k 16 vjeç), I.M. (m/sh/k 30 vjeç ) , A.TH. (m/sh/k 24 vjeç) dhe A.TH. (f/sh/k/ 30 vjeçare, më datën 03.11.2019,në bashkëveprim, me forcë kanë depërtuar në shtëpinë e viktimës A.M. nga ku kanë vjedhur 36.000 euro dhe stoli ari në vlerë 8.000 euro. Gjatë hetimeve është gjetur një sasi e të hollave të vjedhura,të cilat i kishin ndarë mes veti, si dhe të dyshuarit kanë pranuar se stolitë e arit i kanë shitur”, thuhet në njoftimin e policisë.

Gjatë intervistimit dhe në prani të avokatëve mbrojtës, të dyshuarit kanë pranuar në tërësi veprën e kryer.

Ndaj katër të dyshuarve, në konsultim me prokurorin e shtetit është caktuar masa e ndalimit për 48 orë, ndërsa ndaj të dyshuarit të mitur 24 orë./21Media