Arrestohet një person për fajde

Të dyshuarit i është caktuar ndalimi prej 48 orëve

Pas hetimeve disamujore,  Policia e Kosovës, ka intervistuar sot A. E. nën dyshimin për fajde dhe pas intervistimit me vendim mbi ndalimin e lëshuar nga Prokuroria Themelore në Prishtinë i është caktuar masa e ndalimit prej 48 orëve.

“Pas raportimit të rastit më datën 27.11.2018 në stacionin policor, rasti është vazhduar të hetohet nga Njësia Rajonale për Hetimin e Krimeve Ekonomike dhe Korrupsionit Prishtinë, me ç’rast është kuptuar se i dyshuari ia ka dhënë rreth 20,000 euro një personi në cilësi të fajdesë.” thuhet në komunikatë.

Ky i fundit është detyruar t’ia kthejë rreth 40 mijë euro, duke përfshirë edhe një veturë dhe një shtëpi, e cila i ‘është llogaritur’ si pjesë e borxhit në emër të fajdesë.

“Njësia Rajonale për Hetimin e Krimeve Ekonomike dhe Korrupsionit në Prishtinë ka marrë veprime ligjore konform urdhëresave të lëshuara nga gjykata kompetente, kundër të dyshuarit të rastit në fjalë, ku fillimisht i është bastisur shtëpia e banimit, me ç’rast gjatë bastisjes kanë hasur dokumentacion që ndërlidhet me rastin.”

Në komunikatë bëhet e ditur që dokumentacioni është sekuestruar përkohësisht, duke përfshirë një laptop dhe telefonin personal  të dyshuarit, të cilat do të dërgohen për ekzaminim në Forenzikë./21Media