Bahtiri do të kërkojë mësues vullnetarë nëse greva nuk ndërpritet të hënën

Sipas Bahtirit, mësimi duhet të vazhdojë

Kryetari i Komunës së Mitrovicës, Agim Bahtiri ka ftuar mësimdhënësit që të ndalin grevën dhe që nga e hëna të fillojnë procesin mësimor.

Ai përmes llogarisë së tij në Facebook është shprehur se nëse procesi mësimor nuk do të fillojë të hënën, kjo komunë do të kërkojë staf mësimor vullnetar për të mbajtur mësim.

“I ftoj mësimdhënësit që ta rishikojnë formën e kërkesës së tyre për rritje të pagave, në mënyrë që t’i japin fund grevës dhe t’ia fillojnë punës që nga e hëna. Nëse greva nuk ndërprehet dhe nxënësit vazhdojnë të humbasin orët mësimore, Komuna e Mitrovicës do të kërkoj staf mësimor vullnetar për ta mbajtur mësimin në shkolla. Të gjithë jemi dëshmitar se edhe gjatë kohës së okupimit dhe masave të dhunshme nga pushtuesi serb shkollat kanë punuar, prandaj mësimi duhet të vazhdojë”, ka shkruar Bahtiri.

Ndërkohë, greva e mësimdhënësve nga 14 janari po vazhdon në nivel të vendit./21Media