Dështon thirrja e Bahtirit, greva e mësimdhënësve vazhdon në Mitrovicë
Vazhdon greva
Mësimdhënësit e shkollave të komunës së Mitrovicës nuk kanë përfillur kërkesën e kryetarit të kësaj komune, Agim Bahtiri, që mësimi të fillojë sot, qoftë edhe me arsimtarë vullnetarë. Drejtori i Arsimit në Mitrovicë, Iset Beka ka konfirmuar për kp mosmbajtjen e mësimit në shkollat e Mitrovicës.
“Jo, nuk është duke u mbajtur mësimi në asnjë shkollë. Nuk kemi as mësimdhënës vullnetarë, me gjasë po hezitojnë për shkak të kolegëve ose SBASHK-ut, nuk e di.”, ka thënë shkurt Beka.
Ndërkaq, kryetar i Sindikatës së mësimdhënësve në komunën e Mitrovicës, Isa Ismajli e ka quajtur të gabuar deklaratën e kryetarit Bahtiri për mbajtjen e mësimit sot, përmes mësimdhënësve vullnetarë. Sipas tij, kryetari Bahtiri nuk ka arritur të gjejë vullnetarë, ndërsa konfirmoi se greva është duke vazhduar në të gjitha shkollat e kësaj komune.
“Deklarata e kryetarit Bahtiri për mbajtjen e mësimit me arsimtarë vullnetarë është e gabuar. Ai me siguri ka tentuar të gjej këta arsimtarë në mesin tonë, por nuk ia ka arritur qëllimit. Greva vazhdon në Mitrovicë 100 për qind.”, ka thënë Ismajli.