Avokati i Popullit ka publikuar Raportin me Rekomandime me qëllim të trajtimit të lirisë së shprehjes

Avokati i Popullit ka publikuar Raportin me Rekomandime me qëllim të trajtimit të lirisë së shprehjes

Dita Botërore e Lirisë së Shtypit përsëri e gjen vendin në përpjekje për t’i tejkaluar sfidat e deritanishme për garantimin e lirisë së shtypit si e drejtë themelore, dhe tregues i nivelit të zhvillimit të demokracisë dhe respektimit të standardeve ndërkombëtare për të drejtat e njeriut në përgjithësi.

Kështu thuhet në deklaratën për media të Avokatit të Popullit me rastin e Ditës Botërore të Lirisë së Shtypit, e cila ka për simbolikë përqendrimin e vëmendjes në rëndësinë e lirisë së shtypit, duke reflektuar në të drejtën për informim dhe lirinë e shprehjes.

Avokati i Popullit përkujton se më 2 nëntor 2017 ka publikuar Raportin me Rekomandime me qëllim të trajtimit të lirisë së shprehjes dhe lirisë së mediave, në fokus të të cilit janë rastet e sulmeve fizike dhe kërcënimeve ndaj gazetarëve.

Raporti tërheq vërejtjen mbi nevojën e avancimit të kornizës legjislative, e cila do të garantonte mbrojtje të mjaftueshme për lirinë e mediave dhe sigurinë e gazetarëve, koordinimin ndërmjet policisë dhe prokurorit të shtetit dhe trajtim me prioritet nga sistemi prokurorial dhe gjyqësor për veprat e kryera kundër gazetarëve, thuhet në njoftimin e dërguar nga zyra e Avokatit të Popullit.

Avokati i Popullit fton institucionet e vendit që të fuqizojnë aktivitetet për të siguruar transparencë në funksion të llogaridhënies publike dhe rastet e kërcënimeve dhe sulmeve ndaj gazetarëve të trajtohen me prioritet dhe t’i zgjidhen në mënyrë efektive.

Ndryshe, në vitin 1993, Asambleja e Përgjithshme e Kombeve të Bashkuara, me qëllim të ndërgjegjësimit për rëndësinë e lirisë shtypit, si dhe për të sjellë në vëmendje qeverive detyrën e tyre për të respektuar dhe mbështetur të drejtën e lirisë së shprehjes, e drejtë e garantuar në Deklaratën Universale të të Drejtave të Njeriut, mori vendim për caktimin e kësaj date, si Ditë Botërore e Lirisë së Shtypit.

Ndryshe sot në Ditën Ndërkombëtare të Lirisë së Mediave Asociacioni i Gazetarëve të Kosovës (AGK), ka mbajtur një protestë, ku është kërkuar përmirësimi dhe rritja e bashkëpunimit me institucionet e sigurisë./21Media

​AGK: Kemi pranuar 8 raste të sulmeve ndaj gazetarëve