Sipas VV ata janë arrestuar për shkak se po merrnin pamje nga seanca gjyqësore

Sipas VV ata janë arrestuar për shkak se po merrnin pamje nga seanca gjyqësore

Lëvizja Vetëvendosje ka bërë të ditur se Policia e Kosovës ka arrestuar dy aktivistë gjatë seancës gjyqësore ndaj katër aktivistëve të kësaj lëvizje gjatë ditës së sotme.

Aktivistët Arianit Beqiri dhe Gerolld Nikoliqi, që sipas VV-së ishin pjesë e ekipit  të medieve, janë arrestuar për shkak se po merrnin pamje nga seanca gjyqësore, e cila ishte e hapur për mediet.

“Një veprim i tillë, i papranueshëm, është tregues i qartë i bashkëpunimit mes policisë dhe drejtësisë së kapur, me synimin që ta largojnë vëmendjen e publikut sa më shumë nga kjo padrejtësi ndaj Adeas, Atdheut, Egzonit e Frashërit. Pafajësia e tyre është e vërteta rreth këtij rasti, e cila do të merret vesh sado që ky rast të zgjatet dhe përkundër jotransparencës së organeve të drejtësisë”, thuhet në njoftimin e VV-së.

VV kërkon lirimin e mënjehershëm të aktivistëve Beqiri dhe Nikoliqi, si dhe të heqet dorë nga ky rast të cilin e quajnë të montuar ndaj katër aktivistëve.

“Përndjekjet ndaj gjithë aktivistëve të Lëvizjes VETËVENDOSJE! duhet të marrin fund. Ato nuk e ndalin në asnjë mënyrë angazhimin tonë për shtet të së drejtës dhe shoqëri të barabartë”, thuhet në fund të njoftimit./21Media