Rritja buxhetore 100 përqind  për Qendrën Kinematografike të Kosovës dhe ligji për teatron do t'i ndihmojnë kinematografisë

Rritja buxhetore 100 përqind  për Qendrën Kinematografike të Kosovës dhe ligji për teatron do t’i ndihmojnë kinematografisë

Ministri i Kulturës, Rinisë dhe Sportit, Kujtim Gashi gjatë vizitës që i bëri sot  Qendrës Kinematografike të Kosovës bëri të ditur se kjo qendër do ketë rritje buxhetore për 100 për qind.

Duke marrë parasysh sukseset filmike në Kosovë, Gashi ka deklaruar se kanë vendosur për rritjen e buxhetit 100 përqind për këtë qendër.

“Kjo qendër ka pasur një buxhet rreth 600 mijë euro për mbështetjen e filmave, dhe ne kemi vendosur që këtë buxhet ta rrisim për 100 për qind. QKK do ta ketë buxhetin për filmat rreth 1 milionë e 200 mijë euro, kurse buxheti total i QKK-së do jetë rreth 1 milionë e 400 mijë euro, kjo për shkak të punës së madhe që po ndodh në këtë qendër të filmit, për shkak të angazhimit të madh dhe çmimeve dhe rezultateve që kanë pasur filmat tonë“, ka thënë Gashi.

Duke inkurajuar të gjithë filmbërësit që të vazhdojnë punën e tyre, Gashi u shpreh se me këtë rritje buxhetore do të mbështesin 28 filma. Ai po ashtu tha se Qendra Kinematografike e Kosovës do i merr mjetet varësisht prej kërkesave nga filmbërësit.

“Me rastin e ridestinimit të buxhetit të cilën e bënë Qeveria e Republikës së Kosovës dhe kemi hapësirë që brenda buxhetit të ministrisë së Kulturës që disa prej institucioneve të kulturës që kanë pasur rezultate dhe suksese t’ia rrisim buxhetin dhe njëra prej tyre është QKK-ja, pra ka hapësira buxhetore brenda ministrisë së Kulturës për shkak se disa projekte të cilat kanë qenë të planifikuara nuk kanë filluar të implementohet dhe do e ridestinojmë buxhetin aty ku kemi nevoja” , u shpreh ministri i Kulturës.

Kurse, drejtori i Qendrës Kinematografike të Kosovës, Arben Zharku duke shpresuar se buxheti  do vazhdojë të rritet për këtë qendër, u shpreh se kjo ndikon që rritet edhe prodhimet filmike në vend.

“Sot i publikojmë edhe vendimet që i ka bërë këshilli drejtues për projektet filmike fituese sivjet, siç e dini më herët juria vlerësuese e ka bërë një përzgjedhje të projekteve filmike, mirëpo pas rritjes buxhetore që kemi pasur nga ministria e Kulturës, juria është takuar rishtazi dhe i ka mbështetur edhe disa projekte që kanë qenë në listë të pritjes që janë poentuar”, ka deklaruar Zharku.

Ndërkohë që sot Ministri i Kulturës, Rinisë dhe Sportit, Kujtim Gashi, ka mbajtur një takim edhe me drejtorët e teatrove të qyteteve kryesore të Kosovës dhe përfaqësuesit e Sindikatës së Teatrove të Kosovës, me të cilët ka biseduar për ligjin e ri për teatrot, në të cilin është duke punuar MKRS-ja.

“I njoftova se në këtë fazë MKRS-ja është duke e përgatitur koncept dokumentin i cili do të miratohet në Qeveri, duke i hapur rrugën ligjit të ri, i cili teatrot e qyteteve të Kosovës do t’i trajtojë me ligj të ri në pjesën e parë të vitit 2019”, ka shkruar Gashi në një postim në Facebook.

Sipas këtij ligji, i cili parasheh rritjen e buxhetit të teatrove, komunat dhe kryetarët e tyre obligohen që të ndajnë buxhet shtesë për zgjidhjen e problemeve me aktorët dhe stafin e teatrove. /21Media