Dy të arrestuar për kërcënimin ndaj drejtorit të KEK-ut Njazi Thaçi
Njazi Thaçi është kërcnuar mbrëmë në lidhje me konkursin e shpallur nga KEK-u
Dy persona janë arrestuar lidhur me kërcënimin që i është bërë drejtorit të KEK-ut, Njazi Thaçi. Këtë e ka konfirmuar zëvendës-kryeprokurori i Prishtinës, Ibrahim Berisha.
“Po mund të ju konfirmoj se dy persona janë arrestuar, për momentin janë në intervistim. Pastaj i takon prokurorit të rastit të vendos për të dyshuarit”, ka thënë zëvendës-kryeprokurori i Prokurorisë Themelore në Prishtinë, Ibrahim Berisha.
Ndërkohë gjatë ditës kanë reaguar edhe Bordi i Drejtorëve të Korporatës Energjetike të Kosovës (KEK) lidhur me kërcënimin që i është bërë drejtorit të KEK-ut Njazi Thaçi.
KEK përmes një komunikate kanë bërë thirrje organeve të rendit dhe drejtësisë të ndërmarrin të gjitha masat e duhura dhe ta hetojnë me prioritet këtë rast.
“Bordi shpreh mbështetjen e plotë për drejtorin menaxhues Njazi Thaçi dhe ndjen keqardhje për shqetësimin që i ka ardhur nga persona të papërgjegjshëm. Nga ana tjetër Bordi i Drejtorëve të KEK-ut garanton aksionarin, Qeverinë e Kosovës dhe qytetarët se çdo konkurs dhe veprim do të mbikëqyret në detaje nga bordi”, është thënë në reagimin e tyre./kallxo