Federer rishkruajti historinë

Federer rishkruajti historinë

Ajka mbretërore britanike dhe më të njohurit e politikës ishin prezent në finalen prestigjioze të turneut më të rëndësishëm dhe më antik në botën e tenisit, aty ku Roger Federer arriti të rishkruajë historinë.

Zvicerani dominoi në finalen përballë kroatit, Marin Çiliç duke mbyllur llogaritë në 3 sete, e duke përvetësuar titullin numër 8 në barin londinez.

36-vjeçari Federer vuajti vetëm në startin e sfidës pasi e rimori veten duke i rrëmbyer dy herë shërbimin rivalit kroat, e madje duke e bërë këtë të fundit të braktiste përkohësisht fushën mes lotëve për shkak të një dëmtimi. Finalja më pas shkoi në rrjedhën e parashikuar dhe veterani i raketave nuk i la asgjë rastësisë, duke mbyllur ballkanasin në mbrojtje e duke e detyruar të gabonte.

Princi William, kryeministrja Theresa May, dhe kryebashkiaku i Londrës nuk u rezervuan në ovacionet e publikut kur Federer ngriti lart trofeun, në një edicion që shkëlqeu që nga fillimi i tij, madje nuk humbi asnjë set në Wimbledon.