Triumfojnë dardanët!

Triumfojnë dardanët!

Në stadiumin “Fadil Vokrri” në kryeqytet, u zhvillua ndeshja mes Kosovës dhe Çekisë, që përfundoi me fitoren e dardanëve (2:1).

Golin e parë në ndeshjen e sotme që u zhvillua ne stadiumin “Fadil Vokrri” e shënoi Çekia në minutën e 16-të, por pas katër minutave barazoi Kosova me anë të sulmuesit, Vedat Muriqit.

Ndërsa, në pjesën e dytë Kosova doli në epërsi me anë të golit të Mërgim Vojvodës, të shënuar në minutën e 67-të.

Pas fitores së Kosovës, reaguan liderët politikë, ndër ta kreu i shtetit, Hashim Thaçi, kryeministri në dorëheqje i Kosovës, Ramush Haradinaj, kryetari i Nismës Socialdemokrate, Fatmir Limaj.

Thaçi në postimin e tij shkroi se kjo ishte fitore historike e Kosovës.

Haradinaj shkroi se kjo fitore e djelmoshave tanë shfaqi shpirtin e një populli triumfues.

“Paraqitje madhështore e djelmoshave tanë në stadiumin “Fadil Vokrri”. Edhe sot, ekipi jonë i pandalshëm, shfaqi shpirtin e një populli triumfues. Mirënjohës për ndjenjën e krenarisë dhe emocionet e papërshkrueshme që po na dhuroni. Kjo është Kosova 100%. Europë, ne po vijmë!”, shkroi Haradinaj në Facebook.

Limaj pas fitores së kombëtares së Kosovës ndaj Çekisë, ka thënë se këta djemë nuk dinë t’i sjellin rezultat tjetër Kosovës përveç fitores.

“Tjetër fitore e madhe e Kosovës. Vazhdojmë të pamposhtur drejt EURO 2020. Krenarë me ju”, ka shkruar ai.

Kosova në 15 ndeshjet e fundit nuk ka asnjë humbje. Ndeshjen radhës Kosova do ta luajë kundër Anglisë, më 10 shtator./21Media