Sipas Gashit, Serbia nuk mundet të marrë të drejta për transmetime televizive në Kosovë

Sipas Gashit, Serbia nuk mundet të marrë të drejta për transmetime televizive në Kosovë

Ministri i Kulturës, Rinisë dhe Sportit, Kujtim Gashi, ka reaguar për transmetimin e Ligës së Kampionëve nga Radio Televizioni i Serbisë.

Sipas Gashit është e papranueshme që televizioni publik serb të transmetojë në Kosovë Ligën e Kampionëve, duke pasur parasysh vuajtjet dhe sakrificat  për ndërkombëtarizimin e sportit të Kosovës.

“Është e papranueshme që pas aq shumë mundimeve, vuajtjeve e sakrificave për të ndërkombëtarizuar sportin e Kosovës, e veçanërisht futbollin, sot të ketë tendenca që të vihet në pikëpyetje anëtarësimi ynë në UEFA e FIFA, nga pretendimet për të transmetuar në Kosovë Ligën e Kampioneve të UEFA-së, përmes Radio Televizionit të Serbisë.” ka thënë ai.

Kosova është e barabartë në UEFA dhe FIFA, tha Gashi  dhe për  këtë siç tha ai, më së shumti jemi borxhli ndaj Legjendës së Sportit tonë, Fadil Vokrrit. “Është fyerje edhe ndaj tij dhe gjithë atyre që kanë dhënë e sakrifikuar aq shumë për të përjetuar emocionet si ato që kishim në ndeshjen premierë Kosovë – Ishujt Faroe. Nëse lejohet një hap i tillë, esencialisht mund të kontestojë barazinë tonë me shtetet e tjera në UEFA dhe FIFA.”, tha ai.

“Kosova është shtet i pavarur e sovran dhe Serbia nuk mund të ketë kurrë me asnjë kompetencë mbi Kosovën, as për sport e as për asnjë gjë tjetër.”, tha Gashi, dukse shtuar se si Ministër i Sportit, pret që të gjitha institucionet përgjegjëse të kryejnë detyrat e tyre për të garantuar pavarësinë e sportit të Kosovës, qoftë në fushat e blerta apo në ekranet tona televizive.

“Ashtu siç nuk mundet më Serbia të organizojë ndeshje futbolli në territorin e Kosovës, nuk mundet as të marrë të drejta për transmetime televizive në Kosovë, sepse ndryshe ky do të ishte cenim i integritetit territorial të shtetit tonë”, ka përfunduar Ministri i Kulturës, Rinisë dhe Sportit, Kujtim Gashi./ 21Media