Një ngjarje jo e zakontë është shënuar sot rreth orës 14:00 tek ura e Ibrit në Mitrovicë

Një ngjarje jo e zakontë është shënuar sot rreth orës 14:00 tek ura e Ibrit në Mitrovicë

Një grua rreth-35 vjeç, e mbështjellë me flamur të Serbisë, ka tentuar të dalë në jug të qytetit të Mitrovicës, duke provokuar kështu situatën, por falë reagimit të policisë u evitua ndonjë incident i mundshëm.

Ajo pas ndaljes dhe legjitimimit nga ana e policit te cepi jugor i urës, tentoi disa herë të ikë në drejtim të veriut, por nuk  u lejua nga pjesëtari i policisë.

Në pamundësi për të ikur në veri, ajo i drejtohet karabinierëve që ishin prezentë tek ura në gjuhën angleze, duke kërkuar ndihmë.

Krejt në fund, ulet në tokë dhe me zë të lartë kërkon ndihmë në gjuhën angleze, ndërsa përforcimet e policisë së Kosovës arrijnë.

Kishte raportime se gruaja në fjalë u arrestua, mirëpo nga Policia e Kosovës, Besim Hoti për portalin rtv21 ka konfirmuar se ajo vetëm është kthyer prapa nga patrulla policore.

Ndryshe, më shumë se 30 persona ishin mbledhur tek ura derisa policia po kryente aksionin.

Mbetet e çuditshme se si pjesëtarët e policisë së veriut nuk e ndaluan gruan te cepi verior i urës, por lejuan kalimin e saj në drejtim të jugut pa e penguar fare, kur dihet situata e ndjeshme në këtë qytet.