Haradinaj: Roli i USAID-i në zhvillimin ekonomik, i pazëvendësueshëm
Gretchen Birkle tha se USAID-i mbetet i përkushtuar për të ndihmuar Kosovën
Kryeministri i Kosovës, Ramush Haradinaj, priti në takim zëvendës asistenten e Administratorit të USAID-it, nga Byroja për Evropë dhe Euroazi në Uashington, Gretchen Birkle.
Haradinaj, theksoi progresin e arritur në Kosovë dhe përkrahjen e fuqishme të USAID-it në ndërtimin e institucioneve demokratike, sundimin e rendit dhe ligjit, zhvillimin ekonomik dhe në fusha të tjera.
Duke shprehur mirënjohje të thellë për përkrahjen e pazëvendësueshme të SHBA-ve dhe të USAID-it, Haradinaj shprehu përkushtimin e plotë për avancimin e mëtejmë të partneritetit dhe bashkëpunimit.
Sipas një komunikate për medie në takim, ku i pranishëm ishte drejtori i Misionit të USAID-it në Kosovë, James Hope, Haradinaj, falënderoi për përkrahjen që USAID-i ka dhënë në krijimin e një ambienti më të volitshëm për të bërit biznes.
Ndërsa, zëvendës asistentja e Administratorit të USAID-it, nga Byroja për Evropë dhe Euroazi në Uashington, Gretchen Birkle, vlerësoi të arriturat e deritashme, bashkëpunimin me institucionet e vendit, si partner serioz në projekte konkrete, duke shtuar se USAID-i mbetet i përkushtuar për të ndihmuar Kosovën në zhvillimin ekonomik, sundimin e ligjit dhe fusha të tjera në interes të vendit./21Media