Haradinaj u takua me Jean Paul Carteron
Diskutuan për forcimin e bashkëpunimit ndërkombëtar
Kryeministri i Kosovës, Ramush Haradinaj, ka pritur sot në takim Presidentin e nderit të Crans Montana Forum, Jean Paul Carteron, me të cilin biseduan për zhvillimet në vend e po ashtu edhe për të arriturat e Kosovës në konsolidimin ndërkombëtar.
Haradinaj e ka falënderuar Presidentin e Crans Montana Forum, Jean Paul Carteron për vizitën e tij në Kosovë dhe për rolin e forumit që të forcojnë bashkëpunimin ndërkombëtar duke promovuar praktikat e mira.
“Jam i nderuar që sot keni ardhur për ta vizituar Kosovën dhe keni shprehur vullnetin që të dëgjoni nga afër për zhvillimet këtu në vend. Është rast i shkëlqyeshëm për Kosovën, që të jetë nikoqire e forumit të radhës të Crans Montana, që do të mbahet në Prishtinë. Ky forum i ka dhënë hapësirë të respektuar Kosovës në të kaluarën dhe është një nga ngjarjet e nivelit të lartë ndërkombëtar”, ka thënë kreu i Qeverisë Haradinaj, duke shtuar gjithashtu rëndësinë e këtyre takimeve për tërheqjen e investimeve të huaja.
Ndërkaq, Presidenti i nderit i Crans Montana Forum, Jean Paul Carteron, ka thënë se ishte kënaqësi të jetë sot në Kosovë dhe të zhvillojë takim me kryeministrin Haradinaj, duke shprehur gatishmërinë e bashkëpunimit edhe në të ardhmen./21Media