Haziri: Për idealet dhe vizionin e Rugovës duhet edhe shumë punë

13 vjet nga vdekja e Rugovës

Në përvjetorin e 13-të të vdekjes së ish-presidentit të Kosovës, Ibrahim Rugova, kryesia e LDK-së bëri homazhe te varri i tij. Kryesia e LDK-së, po ashtu bëri vizitë edhe te familja Rugova. Në këtë përvjetor u tha se për idealet e tij për një Kosovë paqësore dhe të zhvilluar ekonomikisht, duhet edhe shumë punë për t’u bërë.

Nënkryetari i Lidhjes Demokratike të Kosovës, Lutfi Haziri tha se edhe kundërshtarët më të mëdhenj janë përulur pas vdekjes së tij. Haziri përmendi grevat dhe protestat në vend, duke shtuar se edhe faktori ndërkombëtar me Kosovën është në marrëdhënie tensionuese.

“Idealet e tij për një Kosovë paqësore dhe të zhvilluar ekonomikisht, krenaret në traditat e veta dhe historinë e vet ka shumë për bërë. Qe sot Kosova është në protesta, sot Kosova është në grevë. Është një lloj kryengritje politike e brendshme që po shpërthen nga pakënaqësitë e ndryshme. Sot raportet edhe me fqinjët, edhe me faktorin ndërkombëtarë, Kosova është në marrëdhënie tensionuese fatkeqësisht dhe natyrisht është jashtë formatit dhe jashtë ideologjisë së rugovizmit që ai e ka lënë”, shtoi Haziri.

Haziri tha se ai ka qenë një politikan i pazëvendësueshëm dhe i paarritshëm.

“Ky përvjetor i ndarjet nga jeta i presidentit historik dhe themeluesit të Republikës, është përvjetor i madh që ne me respekt dhe deri në gjunjëzim e respektojmë, veprën mbi të gjitha që e ka lënë prapa. Ka lënë një ideologji, e cila po vazhdon me shtetndërtim, në ruajtjen e Republikës , në ndërtimin e paqes për të gjithë njerëzit, ndërtimin e paqes në regjion. Në luftën në paqe arma e tij ka qenë dialogu, durimi politikë, toleranca politike dhe respekti për më të vegjlit dhe më të dobëtit”, tha ai.

Në përvjetorin e vdekjes së Rugovës, foli edhe akademiku, Sabri Hamiti. Ai tha se Rugova ishte burrë i pjekur intelektualisht, duke vlerësuar lartë idetë e tij të shtet-ndërtimit.

“Rugova ka qenë burrë i pjekur intelektualisht, i marum kur u maru LDK-ja. Ai u bo intelektual ekselent edhe pa u formu LDK-ja, veprimtaria është pjesa e dytë e tij. Por, edhe këtu është bërë ekselent, kështu që pak si vështirë është të bëhen dyjat, është fat i Kosovës. …Si gjithmonë e kujtojmë, jo vetëm sot, por do ta kujtojmë gjithë. Natyrisht sot është një ditë që e kujtojmë më veçantë. Që e ka brena dhimbjen, patjetër, por e ka edhe trashëgiminë që jeta pakufi nuk është e askujt…Unë mendoj që Rugova gjithnjë e më tepër kujtohet, bile kujtohet më i kulluem në idetë e tij, që i prodhon koha. Kështu që trashëgimtarët nëse e kanë marrë këtë trashëgimi… Juve ju kujtojmë se jeni familje”, tha ai.

Ish-Presidenti, Ibrahim Rugova ka vdekur më 21 janar të vitit 2006.

Back to top button