Kërkohet futja e Edukimit Medial në planprogramin shkollor

Kërkohet futja e Edukimit Medial në planprogramin shkollor

Instituti EduMedia ka reaguar ashpër ndaj dezinformatës së shpërndarë për ‘punësimin’ e një asistenti në Universitetin e Prishtinës. I apostrofuari ka shpërndarë një postim në llogarinë e tij në Facebook, me shumë gabime drejtshkrimore.

Në reagimin e Institutit EduMedia thuhet se pre e këtij informacioni të rremë për gjoja punësimin e tij ka rënë edhe një profesor i UP-së dhe ish-deputet. Të njejtën përmbajtje e kanë shpërndarë edhe persona të tjerë në rrjetet sociale, por edhe disa media.

Lidhur me këtë, Instituti EduMedia u ka bërë thirrje qytetarëve të Kosovës të kenë gjykim kritik për përmbajtje të tilla të paverifikuara.

“Pre e kësaj propagande nuk ishin vetëm disa të rinj, siç mendohet zakonisht, por edhe shumë persona me kualifikime të ndryshme akademike, gjë që tregon se është rrënuar shumë jo vetëm kohezioni social po edhe aftësia e shumë njerëzve për ta dalluar të vërtetën nga e pavërteta”, thuhet ndër të tjera në komunikatën e Institutit EduMedia.

Në reagimin e Institutit ndër tjerash kërkohet nga institucionet shtetërore të arsimit që të fusin në programet e shkollës lëndën e edukimit medial.

EduMedia është një institut i posa krijuar nga një grup ekspertësh të fushës së medies dhe komunikimit i cili promovon konceptin e edukimit medial në arsimimin formal dhe joformal. Edhe Universiteti i Prishtinës ka demantuar përmbajtjen e shpërndarë nëpër rrjete sociale e media lidhur me ‘punësimin’ e analfabetit në pozitën e asistentit në një degë që s’ekziston në asnjë universitet në Kosovë.

Instituti EduMedia ka një synim kryesor, mobilizimin e lexuesve të të gjitha moshave dhe nivelit të arsimimit, të zhvillojnë aftësitë e gjykimit kritik ndaj përmbajtjeve mediale dhe hulumtimin e rasteve të keqinformimit duke ofruar udhëzime për lexuesit për të identifikuar indikacionet e përmbajtjeve të tilla në media.

“Instituti EduMedia tërheqë vërejtjen lidhur me plasimin e dezinformatave në rrjete sociale e në medie, që është duke shënuar rritje gjithandej dhe duke shkaktuar hutesë dhe nervozë tek publiku. E tillë ishte edhe shpërndarja e një dezinformate kundër Universitetit të Prishtinës, gjoja me pranimin e një asistenti, që nuk ditka drejtshkrimin. Shqetësues është fakti se atë dezinformatë e besuan dhe e përhapën një numër i madh njerëzish, duke shfryrë edhe akuza të rënda kundër institucionit më të rëndësishëm të arsimit të lartë në vendin tonë. Pre e kësaj propagande nuk ishin vetëm disa të rinj, siç mendohet zakonisht, por edhe shumë persona me kualifikime të ndryshme akademike, gjë që tregon se është rrënuar shumë jo vetëm kohezioni social po edhe aftësia e shumë njerëzve për ta dalluar të vërtetën nga e pavërteta. Posaçërisht shqetësues ishte edhe raportimi i disa medieve për këtë rast, duke e plasuar informacionin te publiku pa e bërë as hapin e parë të një gazetarie profesionale dhe etike, verifikimin e informacionin nga burimet. Prandaj, Instituti EduMedia u bën thirrje qytetarëve që të kenë vëmendje për ato që lexojnë në rrjete sociale e në medie dhe ta kenë parasysh se aty mund të postohen edhe dezinformata. Gjykimi kritik ndaj përmbajtjeve të tilla është i domosdoshëm, për secilin. Instituti EduMedia fton edhe me këtë rast institucionet shtetërore të arsimit, që të fusin në programet e shkollës lëndën e edukimit medial, e cila do të ndihmonte fëmijët dhe të rinjtë të marrin një edukim adekuat lidhur me mediet dhe të rrisin shkallën gjykimit kritik. Gjithsesi nevoja për edukim medial edhe në nivelin joformal për mësuesit dhe qytetarët, po bëhet çdo ditë e më urgjente. Instituti EduMedia është i gatshëm të ofrojë ekspertizën e vet edhe në këtë drejtim.”, thuhet në reagimin e Institutit EduMedia.

Personi që pretendonte që është pranuar si asistent në Universitetin e Prishtinës, e ka bërë këtë shkrim më 21 gusht.

Pas postimit të tij, ka pasur reagime të shumta nga profesorët universitarë që e dënuan ashpër këtë veprim të tij, me qëllimin për ta dëmtuar Universitetin e Prishtinës./21Media