Mënyra të reja për të fshehur eksplozivë në pajisjet elektronike

Mënyra të reja për të fshehur eksplozivë në pajisjet elektronike

Shërbimet amerikane të zbulimit besojnë se ISIS dhe organizata të tjera terroriste kanë zhvilluar mënyra të reja për të fshehur eksplozivë në pajisjet elektronike, që sipas testeve të FBI-së mund t’u shpëtojnë kontrolleve të sigurisë në aeroporte.

Ato që rrisin edhe më tej shqetësimet janë sugjerimet e inteligjencës se terroristët kanë siguruar pajisje të sofistikuara sigurie për të testuar sesi të shmangin me sukses lëndë shpërthyese në laptope dhe mjete të tjera elektronike.

Informacionet e grumbulluara gjatë muajve të fundit luajtën një rol të rëndësishëm në vendimin e administratës Trump për të ndaluar mbajtjen e laptopeve dhe pajisjeve të tjera elektronike në fluturimet nga 8 vende të Lindjes së Mesme dhe Afrikës.

CNN ka zbuluar se përmes një serie testesh të zhvilluara në fund të vitit të kaluar, FBI-ja arriti në përfundimin se identifikimi i bombave të fshehura në laptop mund të jetë më i vështirë se në të kaluarën.

Byroja Federale e Hetimeve u fokusua tek disa modele specifike të makinerive skanuese, që janë aprovuar nga administrata për sigurinë në transport e që përdoren në SHBA dhe rreth botës.

“Edhe pse nuk mund të hyjmë në detaje, kemi informacione se aviacioni civil vazhdon të jetë në shënjestër të grupeve terroriste”, i tha CNN-it Departamenti për Sigurinë e Brendshme.

Ekspertët e sigurisë thonë se urdhri për ndalimin e pajisjeve elektronike në fluturimet nga 8 vende është plotësisht i nevojshëm bazuar në aftësitë dhe zonat ku pozicionohen grupet terroriste.