Ivanka Trump nuk do të jetë në krye të Bankës Botërore

Trumb do të ndihmojë në përzgjedhjen e kandidatëve amerikanë

Ivanka Trump, vajza e presidentit të SHBA Donald Trump nuk do të jetë kandidate e SHBA-së për kreun e Bankës Botërore.

Ajo, megjithatë, do të ndihmojë në përzgjedhjen e kandidatëve amerikanë, njoftoi Shtëpia e Bardhë, transmeton Bloomberg.

Presidenti i Bankës Botërore, Jim Yong Kim papritur javën e kaluar ka njoftuar se heq dorë nga kjo pozitë, më shumë se tri vjet para përfundimit të mandatit.

“Sekretari amerikan i Thesarit Steven Menuchin ka kërkuar nga Ivanka Trump për të ndihmuar në procesin e zgjedhjeve të SHBA, e cila në dy vjetët e fundit ka punuar ngushtë me udhëheqjen e Bankës Botërore”, ka thënë Jessica Dito, zëvendësdrejtoreshë e komunikimit në Shtëpinë e Bardhë.

Dito ka theksuar se informacioni rreth konsideratës së Ivanka-s si kandidate ishte i pasaktë.

Komiteti i Bankës Botërore njoftoi të enjten se do të fillojë të marrë nominimet për një udhëheqës të ri muajin e ardhshëm dhe se do të emërojë një zëvendësim për Kim deri në mes të prillit.