Ron Johnson e sheh të domosdoshme arritjen e një marrëveshje përfundimtare mes Kosovës e Serbisë

Ron Johnson e sheh të domosdoshme arritjen e një marrëveshje përfundimtare mes Kosovës e Serbisë

Arritjen e një marrëveshje përfundimtare mes Kosovës dhe Serbisë, e sheh si të domosdoshme senatori amerikan, Ron Johnson. Këtë gjë, ai e bëri të ditur pas takimit që e pati me Presidentin e Kosovës, Hashim Thaçin.

“Është gjithmonë kënaqësi të mirëpresësh Presidentin Thaçi në Uashington DC. E respektoj kurajon e Presidentit të Kosovës, sepse ai po mundohet të arrijë diçka shumë të vështirë dhe ajo është arritja e një zgjidhje paqësore mes Serbisë dhe Kosovës. Ne në Shtetet e Bashkuara jemi këtu që ta mbështesim atë”, ka shtuar senatori Johnson.

Sipas tij, Presidentit Thaçi dhe Presidentit Vuçiq duhet t’ju lënë hapësirën që të vijnë deri te marrëveshja, sepse ajo sipas tij duhet të bëhet mes palëve. “Në momentin që marrëveshja të arrihet të sigurojmë përkrahje që të sigurohemi se marrëveshja prodhim paqe, stabilitet siguri dhe prosperitet për popullin e Kosovës dhe Serbisë që të ecin përpara”, ka theksuar ai pas takimit me presidentin Thaçi.

Senatori Johnson ka thënë se një marrëveshje është e domosdoshme për të ardhme të ndritura të të dyja shteteve dhe ne jemi këtu që ta mbështesim dhe sërish kam respekt të thellë për Presidentin Thaçi për kurajon që po e tregon që të arrijë diçka kaq të vështirë.

Nga ana tjetër, presidenti Thaçi ka falënderuar senatorin Johnson për mbështetjen e vazhdueshme në këtë proces. Ai ka shtuar se arritja e kësaj marrëveshjeje është e vështirë, por se gjithçka do të lehtësohet me ndihmën amerikane.

“Është kënaqësi për mua që sot takova senatorin Johnson i cili shpesh ka vizituar edhe Kosovën edhe Serbinë. Na ka inkurajuar vazhdimisht që të punojmë për arritjen e një marrëveshje gjithëpërfshirëse në mes të Kosovës dhe Serbisë që nënkupton njohjen reciproke, anëtarësimin e Kosovës në OKB pas zëvendësimit të Rezolutës 1244, e di që nuk do të jetë një proces i lehtë por me mbështetjen e Shteteve të Bashkuara të Amerikës, të senatorit Johnson gjërat mund të arrihen, mund të konkretizohen, mund të arrihet marrëveshja paqësore historike”, ka theksuar Thaçi.

Në një postim në Facebook, Thaçi ka shkruar se me senatorin kanë biseduar për tema me interes të dy shteteve dhe se të gjitha institucionet e SHBA-së mbështesin arritjen e një marrëveshjeje mes Kosovës dhe Serbisë.

“Në Senatin e SHBA-së takova edhe senatorin Ron Johnson, me të cilin biseduam për shumë tema me interes të dy shteteve tona. Është një mbështetje unike e të gjitha institucioneve të SHBA-së për arritjen e një marrëveshjeje ndërmjet Kosovës dhe Serbisë, që siguron njohjen reciproke dhe anëtarësimin e Kosovës në NATO, BE dhe OKB”, ka shkruar kreu i shtetit.

Presidenti Thaçi tash e sa ditë po qëndron për vizitë zyrtare në Shtetet e Bashkuara të Amerikës. Në fokus të diskutimeve me zyrtarët e lartë amerikanë  është dialogu Kosovë-Serbi dhe arritja e një marrëveshjeje ligjërisht obliguese për dy shtetet./21Media