Konfirmohet zotimi me BERZH për investime në projektin “Qyteti i Gjelbër”

Qëllimi i projektit është rritja e bashkëpunimit mes Komunës dhe BERZH-it në kuadër të Qyteteve të Gjelbra

Kryetari i Prishtinës, Shpend Ahmeti nënshkroi sot Konfirmimin e Zotimit për Bankën Botërore për Rindërtim dhe Zhvillim (BERZH), në emër të Komunës së Prishtinës, për Prishtinën Qytet të Gjelbër.

Qëllimi i këtij Konfirmimi është rritja e bashkëpunimit mes Komunës dhe BERZH-it për të promovuar projektet e veçanta në kuadër të idesë për Qytetet e Gjelbra (Green Cities).

Sipas kumtesës për media dërguar nga Komuna e Prishtinës, Banka Evropiane për Rindërtim dhe Zhvillim do të sigurojë fonde për ta mbuluar koston e këshilltarëve që do ta bëjnë hartimin e Planit të Veprimit për Qytetin e Gjelbër, këshilltar që do të angazhohen si ekspertë të fushës përmes rregullave të prokurimit të BERZH-it.

Komuna e Prishtinës do të angazhohet në përpilimin dhe zbatimin e këtij plani përmes krijimit të një Komiteti Drejtues, që do të udhëhiqet nga një zyrtar i caktuar komunal; mbledhjes së informacioneve të nevojshme në kohën e duhur; dhe caktimit të personave përgjegjës që do të bashkëpunojnë me këshilltarët e angazhuar nga BERZH-i.

Palët do të bashkëpunojnë në përgatitjen, financimin dhe zbatimin e së paku një projekti në vlerë prej 2 deri në 150 milionë euro, që ka të bëjë me: menaxhimin e mbeturinave të ngurta; ujërat e zeza; ndriçimi publik; transporti urban; si dhe efikasiteti i energjisë dhe energjia e ripërtrishme.