Krasniqi tha se kanë pritur rezultat më të mirë nga zgjedhjet

Krasniqi tha se kanë pritur rezultat më të mirë nga zgjedhjet

Kryetari i Këshillit Kombëtar të partisë Nisma Socialdemokrate, Jakup Krasniqi tha se Nisma është brenda rezultatit zgjedhor që i duhet për të qenë pjesë e Kuvendit të Kosovës. Megjithatë, theksoi se po presin certifikimin e rezultateve finale nga Komisioni Qendror i Zgjedhjeve për të qartësuar pozicionin e Nismës nga zgjedhjet e 6 tetorit. Krasniqi deklaroi se organet drejtuese të partisë shumë shpejtë do të marrin një vendim lidhur me përfshirjen e mundshme në Qeverinë e Kosovës.

Jakup Krasniqi dikur kryetar tha Kuvendi, se kanë pritur rezultat më të mirë nga zgjedhjet e 6 tetorit, por gjithashtu thekson se administrimi i votës nuk është bërë siç duhet.

“Sovrani e ka kryer detyrën e vet më së miri, e ka kryer sipas informacioneve që ka pasur. Konsideroj që administrimi i votës së qytetarëve nuk është bërë mirë, megjithatë janë bërë përpjekje edhe nga Komisioni Qendror Zgjedhor që të bëjë korrigjimin, ne presim rezultatet përfundimtar zyrtar, që ta shohim ku jemi si subjekt politik dhe në fund të fundit duhet ta shikojnë gjithë subjektet politike si kanë dalë nga këto zgjedhje”, pohoi ai.

Ai deklaroi se prej informacioneve që ka, aktualisht Nisma është mbi 5%, por që po presin certifikimin e rezultateve finale për t’u vërtetuar kjo.

“Mendoj që Nisma është brenda rezultatit zgjedhor që i konvenon të jetë pjesë e Kuvendit të Kosovës, dhe pjesë e institucioneve të Kosovës, megjithatë ne jemi të vetëdijshëm qË duhet ta presim rezultatin final… Është mbi 5%, kështu kam informacione, ta shikojmë rezultatin përfundimtar, gjithnjë po them është rezultati final ai që do ta tregojë se ku është Nisma”, tha Krasniqi.

Ai u përgjigj edhe si do të veprojë Nisma nëse e kalon pragun zgjedhor dhe bëhet pjesë e Kuvendit të Kosovës.

“Për këtë çështje, Nisma dhe organet e saj, deputetët që do të jenë pjesë e Kuvendit do të bisedojnë dhe do të marrin vendimin së shpejti në ditën e ardhshme”, pohoi ai.

Nisma Socialdemokrate është partia që ka kërkuar rinumërim në nivel vendi të votave të 6 tetorit, më arsyetimin se janë bërë shkelje gjatë procesit zgjedhor, e që pastaj ka ndikuar në rezultat.
Komisioni Qendror i Zgjedhjeve, me rekomandime të Qendrës për Numërim dhe Rezultate, ka rinumëruar gati gjysmën e vendvotimeve, duke thënë se ka pasur probleme të ndryshme me formularë.

Ditët në vijim, KQZ pritet të bëjë certifikimin e rezultateve finale, pas numërimit të votave me kusht dhe ato nga persona me nevoja të veçanta.