Limaj ambasadorit kanadez: Platforma në frymë me Kushtetutën e vendit
Limaj njoftoi ambasadorin për punën e delegacionit në finalizimin e platformës për bisedime me Serbinë
Zëvendëskryeministri i Kosovës, Fatmir Limaj njëherësh bashkëdrejtues i Delegacionit Shtetëror për Bisedime me Serbinë, priti në takim ambasadorin e Kanadasë në Kroaci dhe ambasador jorezident për Kosovën, Daniel Maksymiuk.
Në këtë takim u diskutua për zhvillimet, në të cilat po kalon vendi e me theks të veçantë punën e Delegacionit Shtetëror të Kosovës dhe dialogun Kosovë- Serbi.
Ambasadori Maksymiuk, ofroi mbështetjen e plotë të Kanadasë për delegacionin në arritjen e marrëveshjes përfundimtare me Serbinë.
Në anën tjetër, Limaj e njoftoi ambasadorin Maksymiuk për punën e delegacionit në finalizimin e platformës për bisedime me Serbinë.
“Platforma është në frymë të Kushtetutës së vendit dhe në vendimin e Gjykatës Ndërkombëtare të Drejtësisë. Përmes platformës në synojmë ta paraqesim zërin unik të Kosovës i cili do të reflektojë vizionin dhe pozicionin zyrtar të vendit në bisedimet me Serbinë”, tha Limaj.
Limaj falenderoi ambasadorin kanadez për ndihmën e vazhdueshme që shteti kanadez ka dhënë për Kosovën në të gjitha etapat.