Sipas MAShT organizata “Astronomy Outreach of Kosovo”, ka bërë presion të madh që shuma totale t’i ndahet vetëm kësaj OJQ-je

Sipas MAShT organizata “Astronomy Outreach of Kosovo”, ka bërë presion të madh që shuma totale t’i ndahet vetëm kësaj OJQ-je

Ministria e Arsimit, Shkencës dhe Teknologjisë shpreh shqetësim lidhur me situatën që ka krijuar organizata joqeveritare “Astronomy Outreach of Kosovo”, e cila pas presionit që ka bërë në institucion, sot ka protestuar para MASHT në lidhje me ndërtimin e Observatorit.

MAShT ka thënë se Zyra e Sekretarit të MASHT ka bërë thirrje publike për mbështetje financiare publike për financimin e projekteve/programeve të OJQ-ve që kontribuojnë në 8 fusha të fokusuara në fushën e Astronomisë.

“Kësaj thirrje i janë përgjigjur 11 aplikues, ndërkohë që organizata jo qeveritare “Astronomy Outreach of Kosovo”, ka bërë presion të madh që shuma totale prej 236,568.63 t’i ndahet vetëm kësaj OJQ-je për projektin “Planetariumi dhe Observatori i parë në Kosovë”, me arsyetimin se Kuvendi i Kosovës i ka ndarë këto mjete për ndërtimin e observatorit, mjete të cilat janë paraparë edhe në Ligjin e Buxhetit për vitin 2019”, thuhet në sqarim.

MASHT thekson se komisioni ka kërkuar interpretim nga Auditori i Brendshëm nëse klasifikimi i projektit në fjalë është i vendosur mirë në kategorinë ekonomike dhe ka marrë përgjigje se “procedurat e filluara nga MAShT / Thirrja Publike me Nr–2–889 nuk është e klasifikuar sipas Ligjit Nr. 06/L -133 mbi ndarjet buxhetore për Buxhetin e Republikës së Kosovës për vitin 2019.

“Andaj, në bazë të opinionit të Auditorit se ky proces duhet të ri-përsëritet dhe të zhvillohen prej fillimit procedurat konform legjislacionit në fuqi, Komisioni është tërhequr nga kjo procedurë. MASHT është i gatshëm të përdorë buxhetin për investime të tilla në hulumtim dhe shkencë, por duke respektuar gjithmonë legjislacionin në fuqi dhe nuk do t’i nënshtrohet asnjëherë asnjë presioni që vjen nga kush-do-qoftë, përfshirë këtu edhe partitë politike që mund të qëndrojnë prapa individëve, apo grupeve të caktuara”, përfundon sqarimi i MASHT.

Ndërtimi i Observatorit dhe Planetariumit të parë në Kosovë që ishte planifikuar të filloi në mars të këtij viti do të shërbente si qendër e parë shkencore dhe kërkimore në Kosovë.