Koreja Veriore ka përshëndetur samitin në mes të Trumpit dhe Kimit

Koreja Veriore ka përshëndetur samitin në mes të Trumpit dhe Kimit

Pas takimit me presidentin amerikan Donald Trump, lideri i Koresë Veriore, Kim Jong-un po vlerësohet lart për krijimin e kushteve të paqes në botë.

Koreja Veriore ka përshëndetur samitin në mes të Trumpit dhe Kimit dhe media shtetërore po e vlerëson takimin si fitore diplomatike për liderin e tyre.

Në raportin e saj të parë për takimin, agjencia zyrtare e lajmeve KCNA ka përmendur 16 herë emrin e Kim, duke shkruar se “takimi i shekullit”, u mbajt me qëllim të përfundimit të marrëdhënieve armiqësore.

Aty përmenden fjalët e Kimit, i cili u zotua për krijimin e kushteve të paqes dhe stabilitetit në gadishullin korean.

Agjencia tutje ka bërë të ditur se liderët kanë pranuar ftesat e njëri-tjetrit për t’i vizituar vendet respektive.

Ndryshe dje Donald Trump dhe Kim Jong-un janë bërë presidentët e parë të SHBA-ve dhe Koresë Veriore që janë takuar, pas një viti që shkëmbyen akuza dhe kërcënime me njëri-tjetrin.

Presidentët shtrënguan duart në një hotel luksoz në ishullin Sentosa të Singaporit para se të vazhdonin bisedimet.