Edhe pas 12 vazhdimeve të seancës konstitutive në Maqedoni asgjë nuk është zgjidhur në Kuvend

Edhe pas 12 vazhdimeve të seancës konstitutive në Maqedoni asgjë nuk është zgjidhur në Kuvend

Zgjidhja e kryetarit të Komisionit për zgjedhje dhe për emërime dhe e kryetarit të Kuvendit assesi nuk po vihen në rend të ditës. Nga LSDM shprehen se kanë zgjidhje për formimin e Qeverisë së re në rast se vazhdon bllokimi i Kuvendit.

Megjithatë ata nuk tregojnë se në çfarë mënyre do të realizohet një gjë e tillë. Sot, njëjtë si dhe ditëve të tjera, ata vetëm deklaruan se formimi i qeverisë do të ndodhë shumë shpejtë, në përputhje me Rregulloren, Kushtetutën dhe ligjet e vendit. Njëherazi, socialdemokratët vazhdojnë t’i bëjnë thirrje kryetarit të shtetit, Gjorgje Ivanovit që të mos i pengojë – siç thonë – proceset demokratike, shkruan TV21.TV

“Ne insistojmë që Qeveria dhe instancat e tjera, përfshi edhe kryetarin e Republikës së Maqedonisë, të kthehen në suazat e kushtetutës dhe të ligjshmërisë dhe ta respektojnë atë që është e caktuar me ligj. Këta po i shkelin kushtetutën dhe ligjet e këtij vendi ndërsa ne si dhe i gjithë komuniteti ndërkombëtar – madje edhe nën kërcënimin me sanksione – bëjmë thirrje që të ndalojnë së penguari zbatimin e vullnetit të shprehur në zgjedhje”, tha Robert Alagozovski, LSDM.

LSDM vazhdimisht përkujton se e ka siguruar shumicë parlamentare legjitime, pas të cilës qëndrojnë të paktën 700 mijë qytetarë të cilët votuan për ndryshim të regjimit, dhe se ka për obligim që ta zbatojë vullnetin e popullit, duke i parandaluar politikat destruktive të Gjorgje Ivanovit dhe të Nikolla Gruevskit. VMRO-DPMNE shumë shpejtë reagoi me një deklaratë nëpërmjet të cilës edhe një herë e akuzoi liderin e LSDM-së, Zoran Zaevin se e ka pranuar “Platformën e Tiranës” dhe po mundohet që të njëjtën ta zbatojë.

“Krimineli Zoran Zaev për amnistinë e tij personale për krimet që i ka bërë është i vendosur që Maqedoninë ta bëjë vend dygjuhësor, ta akuzojë popullin dhe vendin e tij për gjenocid, ta ndërrojë emrin e shtetit të tij sipas qejfit të grekëve dhe në fazë përfundimtare ta federalizojë Maqedoninë. Qytetarët janë kundër çdo lloj platforme të huaj dhe kundër përzierjes në punët e brendshme në Maqedoninë”, nga VMRO-DPMNE.

Një polarizim i këtillë ndërmjet LSDM-së dhe VMRO-DPMNE-së nuk jep shpresë se në seancën e nesërme parlamentare do të mbahet një debat thelbësor, në vend të replikave të pafundme nga radhët e deputetëve të VMRO-DPMNE-së, të cilët praktikisht po e bllokojnë zgjedhjen e kryetarit të kuvendit dhe të qeverisë së re në Maqedoni./21Media