Misioni i OSBE-së në Kosovë organizon panairin tregtar shumetnik për gratë pronare të bizneseve

Duke filluar nga nesër, Misioni i OSBE-së në Kosovë organizon panair tregtar dy-ditor në Prishtinë për gratë pronare të bizneseve nga jugu dhe veriu i lumit Ibër

Rreth 30 gra ndërmarrëse nga komuniteti shqiptar dhe ai serb i Kosovës që menaxhojnë biznese të vogla, kryesisht artizanale në fshatrat e tyre përkatëse, do t’i paraqesin dhe shesin produktet e tyre në panair. Panairi do të shërbejë edhe si mundësi për rrjetëzimin e tyre dhe pikë takimi për të rinjtë dhe punëdhënësit e mundshëm, si dhe do të ndihmoj në rritjen e bashkëpunimit dhe dialogut ndëretnik.

Një numër i stendave të organizatave ndërkombëtare dhe kompanive të punësimit nga sektori privat do të jenë gjithashtu pjesë e panairit.

Panairi tregtar do të jetë i hapur për publikun më 13 dhe 14 korrik. Tendat e bizneseve do të jenë të hapura nga ora 10:00 deri 16:00. Aktivitete tjera përfshirë një ekspozitë me foto dhe diskutime publike do të vazhdojnë të mbahen deri në 19:30.

Panairi do të hapet me një fjalë rasti nga Shefi i Misionit të OSBE-së në Kosovë, Ambasadori Jan Braathu.

Ftohen përfaqësuesit e mediave që të marrin pjesë në këtë ngjarje nesër, e enjte 13 korrik 2017, në Shehin Zahir Pajaziti në Prishtinë, me fillim në ora 11:00.