Naftëtarët kundërshtojnë vendimin e ministrit Shala
Është kërkuar edhe themelimi i një instituti që do të hulumtojë cilësinë e naftës
Shoqata e ndërmarrjeve që merren me qarkullim të naftës, derivate të naftës, gazrave dhe lubrifikanteve (SHQNGL) ka kundërshtuar vendimin e ministrit të Tregtisë dhe Industrisë, Endrit Shala, që obligon kompanitë që shesin derivate t’i pastrojnë rezervarët çdo 3 vjet.
Kryetari i Shoqatës, Fadil Berjani në një konferencë të mabjtur sot ka thënë se kanë pasur takim me ministrin e Tregtisë dhe Industrisë, Endrit Shalën, porse nuk janë marrë parasysh kërkesat e tyre.
Ai ka theksuar se është për tu habitur se një ministër në largim merr një vendim të tillë dhe i lë naftëtarët në një pozitë të keqe, ku nuk kanë as ku të ankohen.
Sipas tij, Ministria e ka bërë udhëzimin administrativ që pastrimi i rezervuarëve të bëhet çdo 5 vite, ndërsa kanë tentuar që ta bëjnë çdo vit.
“Kërkund në botë nuk bëhet pastrimi i rezervuarëve. Ju lutem, qytetarët ta kuptojnë që pastrimi i rezervuarëve nuk iu bën mirë qytetarëve, iu bën vetëm dëm, pasi një pastrim i tyre kushton rreth 700 euro.. Kjo nuk është në rregull, nuk është normale që pastrimi i rezervuarëve të bëhet çdo tri vite”, ka thënë ai.
Anton Figel, naftëtar nga Sllovenia ka treguar si është e rregulluar kjo punë në Slloveni.
“Në Slloveni pastrimi i rezervuarëve bëhet çdo 10-15 vjet. Ndërsa çdo 5 vjet pompa nuk mbyllet, por vetëm kontrollohet gjatë punës”, ka shtuar ai.
Në këtë konferencë është kërkuar edhe themelimi i një instituti që do të hulumtojë cilësinë e naftës dhe të ketë fjalën e tij kryesore në hartimin e ligjit.