Veseli takohet me senatorë dhe kongresmenë amerikanë

Veseli takohet me senatorë dhe kongresmenë amerikanë

Kryetari i Kuvendit të Kosovës, Kadri Veseli ka takuar në Washington senatorin demokrat Gary Peters dhe kongresmenin republikan Vern Buchanan, me të cilët ka diskutuar për zhvillimet politike në Kosovë dhe rajon, si dhe për bashkëpunimin ndërmjet Kosovës dhe SHBA-së.

Gjatë takimit me senatorin Peters, i cili është anëtar i Komitetit për Siguri Kombëtare në SHBA, Veseli foli për të ardhmen e ushtrisë së Kosovës dhe bashkëpunimin e saj me ushtrinë amerikane.

Senatori Peters, nga ana e tij, shprehu mbështetjen për të ardhmen e ushtrisë së Kosovës drejt anëtarësimit në NATO.

Ndërsa në takim me kongresmenin Buchanan, Veseli ka diskutuar për çështjet tregtare dhe për nxitjen e investimeve amerikane në Kosovë.

Kryeparlamentari tha se Kosova ka potencial të zhvillimit ekonomik dhe tashmë ka infrastrukturë moderne për investitorë të jashtëm.

Ndërsa Buchanan, tha se është duke u interesuar që të nxisë kompani amerikane për të investuar në Kosovë në sektorë të ndryshëm.