Osmani takon përfaqësues të 13 agjencive të Kombeve të Bashkuara
Kosova e gatshme të bashkëpunoj me këto agjenci
Kryetarja e Kuvendit të Kosovës, Vjosa Osmani, sot priti në takim një delegacion të përbërë nga përfaqësues të 13 agjencive të Kombeve të Bashkuara, të udhëhequr nga Ulrika Richardson, koordinatore zhvillimore e OKB-së në Kosovë.
Në këtë takim u diskutua për projekte zhvillimore, të cilat përkrahen nga këto agjenci.
Osmani shprehu gatishmërinë e institucioneve të Republikës së Kosovës për bashkëpunim me këto agjenci.
Temë qendrore e diskutimeve ishte investimi në fushat që janë në funksion të Objektivave të Zhvillimit të Qëndrueshëm, specifikisht në krijimin e parakushteve për barazi në punësim, sigurim të shëndetit të grave shtatzëna dhe të nënave, pastaj të drejtat e punëtorëve, mbrojtje të mjedisit etj.
Osmani theksoi edhe nevojën për rritje të buxhetit në shëndetësi, arsim dhe politika të punësimit.
Palët u pajtuan që ta intensifikojnë bashkëpunimin, në mënyrë që të rritet cilësia e punës së Kuvendit të Kosovës nëpërmjet përkrahjes nga këto agjenci.