Panucci arsyeton humbjen e Shqipërisë

Panucci arsyeton humbjen e Shqipërisë

Trajneri i Kombëtares shqiptare, Cristian Panucci nuk u duk i shqetësuar, pavarësisht humbjes 3-0 ndaj Spanjës, ndërsa pranoi se ishte e vështirë të bëhej rezultat pozitiv.

“Nuk mund të luanim me Spanjën ballë për ballë, sepse është një nga ekipet më të mira të botës. Provuam të mbyllim hapësirat dhe të kundërsulmojmë, por ata janë shumë të shpejtë dhe na vunë në vështirësi, sidomos në pjesën e parë”, tha Panucci.

Trajneri italian vlerësoi paraqitjen e kuqezinjve, që nuk e humbën toruan edhe kur ishin në disavantazh të tre golave dhe arritën të prodhojnë një pjesë të dytë mjaft të mirë.

“Mendoj se dhamë maksimumin dhe kërkuam t’i sulmojmë spanjollët. Ne krijuam 3-4 raste në fillim, por ata na ndëshkuan në mundësinë e parë. Në dy momentet e shtyllave ishim edhe disi të pafat, por të mos harrojmë se Spanja i shënoi tre herë edhe Italisë. Mund të them se më pëlqeu veçanërisht mënyra se si interpretuam pjesën e dytë”, tha trajneri i kuqezinjve.

Panucci u shpreh se tani ekipi do të rikuperojë për të qenë i gatshëm për ndeshjen ndaj Italisë, në “Loro Boriçi”.

“Duhet të jemi gatshëm për ndeshjen ndaj Italisë më datë 9. Është një takim mjaft i ndjerë nga i gjithë populli shqiptar dhe do të mundohemi të marrim maksimumin për tifozët dhe për të mbyllur mirë edicionin”, tha Panucci.