Qeveria: Është ndërmarrë nisma për zgjidhjen e padefinuar të statusit të zjarrfikësve

Qeveria: Është ndërmarrë nisma për zgjidhjen e padefinuar të statusit të zjarrfikësve

Me thirrjet “Ne jemi shpëtimtarë dhe ne shpëtojmë jetë”, zjarrfikësit nga të gjitha komunat e Kosovës kanë protestuar sot para Qeverisë, duke kërkuar kushte më të mira për punë.

Pas protestë ka ardhur reagimi i Qeverisë së Kosovës ku ndër të tjera në reagimin e tyre thuhet se Qeveria ka ndjekur me vëmendje protestën e zjarrfikësve të Kosovës dhe ka angazhuar përfaqësuesit e saj që të sqarojnë për ta, vullnetin e Qeverisë për ta zgjidhur problemin e tyre.

“Ju informojmë që për herë të parë në Kosovë, e iniciuar me kërkesën personale të Kryeministrit të Republikës së Kosovës, Ramush Haradinaj, është ndërmarrë nisma për zgjidhjen e padefinuar të statusit të tyre, përmes krijimit të koncept dokumentit, që më vonë do të bëhet edhe rregullore e punës dhe i cili do të përcaktojë qartë statusin e zjarrfikëseve në Kosovë”, thuhet në reagimin e Qeverisë.

Më tej në reagim thuhet se kjo rregullore do të përfshijë edhe shumicën e kërkesave që zjarrfikësit kanë, përmes komisionit i cili po punon në kuadër të Ministrisë së Punëve të Brendshme.

“Është e rëndësishme të njoftohet opinioni, por edhe zjarrfikësit, që një pjesë e kërkesave të tyre kanë të bëjnë me Komunat, nga të cilat menaxhohen dhe vetëm përmes nismës tonë, konfuziteti se kujt i takojnë në menaxhim dhe në paga, do të sqarohet, përmes ligjit”, thuhet në reagim.

Definimi i statusit të zjarrfikësve do të jetë zgjidhja e vetme dhe afatgjate për ta dhe këtë rrugë është duke e ndjekur Qeveria e Kosovës dhe për këtë janë njoftuar edhe drejtuesit e zjarrfikësve të Kosovës, vijon reagimi nga Qeveria e Kosovës./21Media