Arrestohet arabi për mashtrim

Arrestohet arabi për mashtrim

Një shtetas arab është arrestuar nga policia e Tiranës për mashtrim. Operacioni policor i koduar “Përshpejtimi” çoi në pranga shtetasin T. M., 41 vjeç, i lindur në Emiratet e Bashkuara Arabe dhe banor në Tiranë.

Gjithashtu, në kuadër të këtij operacioni u procedua në gjëndje të lirë shtetasi E. M., 40 vjeç dhe u shpall në kërkim shtetasia M. M., 49 vjeçe (të dy shtetas shqiptar).

Sipas policisë, “këta shtetas në bashkëpunim me njëri-tjetrin duke u kamufluar si investitor dhe partner për investime në Shqipëri, u premtonin shtetasve të huaj me kombësi egjiptiane të cilët shfaqnin interes se mund t’ju siguronin atyre pasaporta të shtetit shqiptar për shuma që varionin mbi 20 mijë euro”.

Nga hetimet e kryera ka rezultuar dhe është dëshmuar se shtetasit e lartpërmendur, ndërmjet një zyre binjakëzimi midis Emirateve të Bashkuara dhe Tiranës, ju kanë marrë disa shtetasve shuma të konsiderueshme në euro duke ju premtuar leje qëndrimi dhe pasaporta shqiptare (por që nuk kanë bërë të mundur dot as aplikimin për dokument të tillë, si pasaporta dhe leja e qëndrimit për shkak të rregullave dhe dokumentave strikte që kërkoheshin nga zyra e kufirit dhe migracionit).

Në cilësin e provës materiale janë sekuestruar:

– Zyra në Tiranë e shtetasit të arrestuar arab;

– Tre njësi kompjuterash të ndryshëm;

– Një aparat celular;

– Dokumenta të ndryshme.

Materialet proceduriale ju kaluan Prokurorisë pranë Gjykatës së Shkallës së Parë Tiranë, në ngarkim të shtetasve të lartpërmendur, për veprat penale “Mashtrim”, “Fshehje e të ardhurave” dhe “Mospagim i taksave dhe tatimeve”, parashikuar nga nenet 143/2, 180 dhe 181 të Kodit Penal./oranews