Projekti më i madh i realizuar në Drenas, vlera 6.8 milionë euro
Inaugurohet nënstacioni elektrik në Drenas
Është bërë inaugurimi i nënstacionit elektrike në Drenas i cili do të shërbejë për të gjitha ekonomitë familjare dhe bizneset e komunës së Drenasit.
Financimin e këtij projekti në vlerën prej 6.8 milionë euro e ka bërë Banka Evropiane për Zhvillim (BERZH) dhe është lloti i tretë në kuadër të projekteve të KOSTT-it.
Në përurimin e këtij projekti i cili është shumë i rëndësishëm për rrjetin elektrike në Kosovë, veçanërisht në Drenas, merrnin pjesë, kryetari i Komunës, Ramiz Lladrovci, përfaqësues të KOSTT-it, KEK-ut, kompani punuese të këtij projekti dhe shumë qytetarë.
Me këtë rast, kryetari i Komunës, Ramiz Lladrovci ka vlerësuar se inaugurimi i këtij nënstacioni do t’i shërbejë për të gjitha ekonomitë familjare dhe bizneset e Komunës së Drenasit dhe më gjerë.
“Kjo është një arritje shumë e madhe, sepse rryma më nuk do të jetë problem në komunën tonë. Falënderojmë donatorët të cilët mirëkuptuan nevojën tonë për furnizim të qëndrueshëm me rrymë, ekzekutuesit e punimeve që Nënstacioni elektrik të përurohet sipas planit si dhe të gjithë bashkëpunëtorët që Drenasi të ketë nënstacionin më modern në Kosovë. Nënstacioni elektrik është investim prej 6.8 milion euro, investim nga KOSTT-i dhe BERZh-i. Për 20 vitet e ardhshme e kemi të garantuar furnizimin si dhe do të shërbej edhe Stadiumit nacional dhe Parkut të Biznesit”, ka thënë kryetari Lladrovci.
Ndërsa kryeministri i Kosovës, Ramush Haradinaj përmes një statusi në Facebook ka thënë se përurimi i këtij nënstacioni është një shtytje për zhvillim ekonomik dhe të tregut të energjisë.
“Lajm i mirë për gjithë banorët dhe bizneset në Drenas me rrethinë është përurimi i sotëm i Nënstacionit 220/10(20)kV Drenasi 2 dhe Linjës së Dyfishtë Ajrore Transmetuese 220 kV.
Një investim prej 6.8 milionë eurosh, bashkëfinancim i Qeverisë së Kosovës dhe BERZH, ky nënstacion, përveç që do të stabilizojë dhe modernizoj tregun e energjisë në këtë anë, do të mundësoj edhe zhvillim të qëndrueshëm ekonomik dhe industrial për shumë biznese në Parkun e Biznesit, ekonomitë e vogla dhe ato familjare.
Drenasi kështu po bëhet qyteti i dytë në Kosovë, pas Mitrovicës për përvetësimin e teknologjisë më të re në fushën energjisë dhe sigurisë, teknologji kjo që rritë besueshmërinë, stabilitetin dhe përfitimet e këtij regjioni.Urime Drenas. Urime Kosovë”, ka shkruar Haradinaj.
Largpërçuesi do të jetë 220kV, i dyfishtë i cili së bashku me nënstacionin që është ndërtuar, kap vlerën e 6.8 milionë euro dhe është projekti më i madh i realizuar në Komunën e Drenasit.
Largpërçuesit të ri 220kV është kyçur në largpërçuesin ekzistues që lidhë SSH Drenasi me NS Prizreni 2, në fshatin Krajkovë dhe gjatësia e tij është 4 kilometra.
Nënstacioni Drenasi 220/10 kV/kV është ndërtuar me standardet e tipit GIS (gjenerata më e re e këtyre pajisjeve) me dy transformatorë te fuqisë 2×40 MVA, pra gjithsejtë 80 MVA transformim dhe se për një kohë shumë të gjatë do ta zgjedhë çështjen e furnizimit me energji elektrike të banorëve dhe bizneseve të Drenasit./21Media