Protestë në burgun e Dubravës, lëndohen të burgosurit

“Nëntë persona e kanë qep gojën me tel”

Disa të burgosur janë lënduar në Burgun e Dubravës, si shenjë proteste dhe pakënaqësie me vendimin e presidentit, Hashim Thaçi, për mos faljen e më shumë të burgosurve.

Lajmin e ka bërë të ditur për kp njëri nga të burgosurit, i cili ka dashur të mbetet anonim.

“Nëntë persona e kanë qep gojën me tel, buzët dhe ka hyrën në grevë urie në pavionin 3 të burgut të Dubravës për shkak të zhgënjimit me vendimin e presidentit Hashim Thaçi për mosfalje të të burgosurve. Edhe të tjerët kanë nisur të qepin gojën, ka nis me eskalu situate. Ata po kërkojnë gazetar”, ka thënë ai.

Pakënaqësitë në këtë burg i ka konfirmuar për kp edhe drejtori i Shërbimit Korrektues të Kosovës, Nehat Thaçi.

“Janë shfaqur në mëngjes disa pakënaqësi, pse ata nuk janë liruar nga presidenti Thaçi. Ata herë pas here shfaqin pakënaqësi, ka persona me që shfaqin pakënaqësi në forma të ndryshme, mund të ketë ndodhur edhe kjo. Nuk e kanë cenuar sigurinë. Ata kohë pas kohe trajtohen edhe nga psikiatri”, ka deklaruar ai.

Megjithatë, njëri nga të burgosurit ka mohuar se ata të burgosur kanë probleme mendore, duke thënë se drejtori Nehat Thaçi duhet të ketë kujdes me deklarata, pasi mund të kontriboujë në eskalimin edhe më të thellë të situatës.

Presidenti i Kosovës, Hashim Thaçi me anë të një dekreti ka falur tre persona të dënuar për vepra të ndryshme penale.

Dekreti i Thaçit mban datën e 27 nëntorit të vitit 2019.

Back to top button