Protestuesit kërkojnë që Kurti të shkojë në Stantërg

Dita e tretë e protestës

Aplikantët e pakënaqur me procesin e fundit të punësimit në ndërmarrjen Trepça, në ditën e tretë të protestës janë duke protestuar para minierës së Trepçës në Stantërg. Ata kanë kërkuar ardhjen në mesin e tyre të kryeministrit të Kosovës dhe ministrit të Zhvillimit Ekonomik, për zgjidhjen e problemit.

Në të kundërtën, ata paralajmëruan nga dita e enjte pjesëmarrje në protestë edhe të fëmijëve, nxënësve, personave me aftësi të kufizuar dhe të tjerëve.

Nehat Mehmeti, njëri nga aplikantët e konkursit për punëtor në minierë, ka bërë të ditur për KP se në këtë konkurs janë pranuar njerëz që kanë pasur më pak pikë, ndërsa janë refuzuar të tjerët me numër pothuajse maksimal të pikëve.

Ai thotë se jeton me prindërit, bashkëshorten dhe dy fëmijë, ndërsa vazhdon të kërkoj punë gjithandej, pa zgjedhur fare, përkundër faktit se është i diplomuar në fakultetin ekonomik.

Edhe Alkan Halili, një tjetër aplikant në këtë konkurs, përkatësisht gjeolog i diplomuar, tha se përkundër faktit që ka arritur pikët maksimale në test, ka mbetur jashtë listës së atyre që janë pranuar.

Sipas tij, gjatë këtij konkursi janë shkelur të gjitha të drejtat elementare të punëtorëve, sepse kusht kryesor për pranim ka qenë paraja dhe pozicionimi partiak.

Në anën tjetër, Arsim Musa, nga këshilli protestues, ka kërkuar ardhjen e kryeministrit të Kosovës, Albin Kurti, si dhe ministrit të Zhvillimit Ekonomik, në mënyrë që të arrihet një marrëveshje për zgjidhjen e këtij problemi.

Në të kundërtën, shtoi ai, protesta e nesërme do të nxjerr në rrugë fëmijë, nxënës, persona me aftësi të kufizuara, pleq e të rinj.

Protesta është duke vazhduar e qetë dhe forcat policore janë prezente gjatë gjithë kohës, të cilat po e vëzhgojnë situatën nga afër. Ndryshe, protestuesit në këto momente deri sa po raportojmë, kanë ngritur tenda dhe kanë sjellë stufa dhe lëndë djegëse, në të cilat po qëndrojnë kohë pas kohe për shkak të motit të ftohtë që po mbretëron në Stantërg.