Haradinaj kujton të rënët e Dukagjinit

Haradinaj kujton të rënët e Dukagjinit

Kryeministri i Republikës së Kosovës në dorëheqje, Ramush Haradinaj ka kujtuar rënien e dëshmorëve në Dukagjin, duke thënë se rënia e tyre shënon fillimin e ofensivës së shtatorit dhe ishin ditë vendimtare për rrjedhën e luftës së UÇK-së dhe të vendit tonë.

“Trimat e lirisë, dolën ngadhënjyes përballë armikut, e sakrificës së tyre i përulemi dhe i jemi falënderues përgjithmonë”, ka shkruar ai në llogarinë e tij “Facebook”.

Haradinaj ka kujtuar të rënët duke vlerësuar lart sakrificën e tyre për liri.

“Familja Zeneli e Jabllanicës dha shumë për çlirimin e vendit. Dritan Zeneli, ushtarak profesionist, teknik i aviacionit, i përndjekur nga regjimi i atëhershëm, u bashkua me kauzën e lirisë që nga fillimi. Ai i stërviste në Gllogjan luftëtarët e rinj, që të përgatiteshin për betejat e radhës. Këtë detyrë e kreu me nder, duke lënë gjurmë të pashlyera në njërin ndër kapitujt më të lavdishëm të historisë sonë, luftës çlirimtare. Komandant Fatoni, ra në krye të detyrës në Jabllanicë. Po atë ditë, Përparim Krasniqi i familjes së Sylërexhëve të Vranocit, familje që i dha atdheut Adrian Krasniqin, u përjetësua në kufirin Kosovë – Shqipëri, duke kryer detyrën e tij të furnizimit me armë. Në pozicionet e luftës, ranë heroikisht edhe Xhevdet Hoti nga Jabllanica e Dushkajës, Haxhi Krasniqi e Muhamet Shala nga Prapaqani, si dhe Shefqet Zukaj nga Belegu”, ka shkruar tutje Haradinaj duke thënë rënia e tyre shënon fillimin e ofensivës së shtatorit në Dukagjin.

Ai në fund tha se trimat e lirisë, dolën ngadhënjyes përballë armikut./21Media