"Ka një rregullore që bankat duhet ta arsyetojnë rritjen e tarifave"

“Ka një rregullore që bankat duhet ta arsyetojnë rritjen e tarifave”

Përfaqësues të institucioneve financiare jo bankare janë të shqetësuar me shërbimet e bankave, veçmas për ngritjen e tarifave.

Kështu u tha në tryezën e Odës Ekonomike me Guvernatorin e Bankës Qendrore të Kosovës, Fehmi Mehmetin, lidhur me faktorët kyç të zhvillimit ekonomik në Kosovë dhe ndikimin e sektorit bankar.

Gani Sallauka nga “Vllesa-Co” tha se nuk po arrin të marrë shërbime të duhura nga bankat.

“Shqetësimi ynë është se sektori bankar me zor është duke na shërbyer. Ose shkon te rritja e tarifave për shtyrje të largimit. Nuk e di si të mund ë vazhdohet kështu”, theksoi Sallauka.

Mehmeti tha se sa i përket rritjes së tarifave, ka një rregullore që bankat duhet ta arsyetojnë rritjen e tarifave.

“Ne si BQK do të shikojmë se bankat komerciale a janë duke vepruar në bazë të rregullores, nëse jo do të ndërmarrim masa ndaj tyre për rritje të tarifave”, tha guvernatori Mehmeti.

Ai ndër të tjera shtoi se sektori bankar ka zvogëluar normat e interesit për kredi. Sipas tij, BQK është në funksion të mbështetjes të sektorit financiar me standarde bashkëkohore.

Drejtori ekzekutiv në Odën Ekonomike Amerikane Arian Zeka, duke e vlerësuar si mjaft të rëndësishëm sektorin bankar ngriti si shqetësuese shtimin e  rasteve, të vjedhjeve, ku sipas tij, është cenuar siguria e bankave.

“Kjo çështje të trajtohet me kujdes më të madh nga institucionet relevante, që asetet e investitorëve të mos rrezikohen si rezultat i sigurisë”, tha Zeka.

Edhe biznesmenë të tjerë paraqiten ankesat e tyre për shërbime bankare, lidhur me kartelat dhe vonesat e transaksioneve kombëtare, si dhe për rritje të tarifave.