Studentët protestojnë kundër paketës anti-shpifje
Pranga dhe pankarta me shkrimin “gjobë”
Një ditë pasi Parlamenti i Shqipërisë miratoi me 82 vota pro paketën anti-shpifje, një grup studentësh protestuan para sheshit të Kryeministrisë në mënyrë simbolike kundër censurës.
Studentët kundërshtojnë atributet që ligji i jep AMA-s dhe AKEP-it mbi mediat.
Me televizorë të thyer, pranga në duar dhe etiketa me mbishkrimin gjobë, ata e quajtën turp votimin e ligjit kundër mediave.
Ndonëse nuk janë pjesë e mediave, studentët shprehen se ky ligj ngjason me rikthimin e nenit 55 në kohën e diktaturës për agjitacion e propagandë, ndërsa protestën do e vijojnë edhe gjatë ditëve të tjera.
Ndonëse protesta ishte paqësore, forca të rendit dhe grupit Shqiponja qëndruan para Kryeministrisë për mbarëvajtjen e protestës.
Në përfundim të protestës që zgjati disa minuta, studentët simbolikisht hodhën në kazanët e kryeministrisë televizionet e thyer.
Protesta pati edhe nga gazetarët, të mërkurën para Parlamentit para miratimit të ligjit.
Paketa anti-shpifje ngjalli shumë debat dhe kundërshti në opinionin publik./oranews