Sot shënohet Dita e të Pagjeturve

Sot shënohet Dita e të Pagjeturve

​Ministri i Drejtësisë në detyrë, Abelard Tahiri në Ditën Ndërkombëtare të Personave të Zhdukur, ka kërkuar edhe njëherë nga Bashkimi Evropian që t’i bëjë presion Serbisë për të zbardhur fatin e personave të zhdukur nga lufta e Kosovës.

Njëzet vjet pas luftës, familjarët ende presin të din çfarë ka ndodhur me të dashurit e tyre.

“Në kërkimin e vazhdueshëm për të identifikuar të dashurit e tyre dhe për t’iu dhënë qetësinë e përhershme, familjarët përballen me pritje të gjata dhe me mos gatishmërinë e shtetit serb për të mbyllur këtë kapitull të dhimbshëm të jetës së tyre. Presioni nga shtetet e Bashkimit Evropian duhet të jetë i vazhdueshëm, në çdo takim me zyrtarët nga Beogradi, deri në hapjen e arkivave dhe informimin e plotë se çfarë ka ndodhur me trupat e qytetarëve nga Kosova”, ka thënë Tahiri.

Tahiri kujtoi se vitin e kaluar me një letër zyrtare, ka kërkuar nga homologët e tij në shtetet anëtare të Bashkimit Evropian që të mbajnë Serbinë përgjegjëse për këtë krim.

“Dua edhe njëherë të falënderoj ministren e Drejtësisë të Francës, Nicole Belloube që në letrën e saj i ka dhënë mbështetje të plotë kërkesë sime. Serbia duhet të dëshmojë se është e gatshme të shkëputet njëherë e përgjithmonë nga politika e Millosheviqit, të respektoj konventat ndërkombëtare, por mbi të gjitha, të tregohet humane dhe të zbardh fatin e 1647 të zhdukurve, prej të cilëve mbi 100 janë fëmijë”, ka shtuar Tahiri.