Ai është ilaç për shumë lloje të lëkurës

Ai është ilaç për shumë lloje të lëkurës

I përdorur në Indi dhe në vendet arabe si ilaç bazë për të rinuar lëkurën, për ritet fetare dhe për përgatitjen e ushqimeve, uji i trëndafilit është ende aktual dhe i kërkuar për cilësitë kundër rrudhave, hidratues dhe tonikë. Zbulojmë shumë cilësi të këtij kozmetiku natyral.

Përdorimi i këtij uji me aromë delikate daton që në vitin njëmijë, kur filozofi, matematicieni dhe mjeku persian Avicenna, zbuloi sesi të nxirte ujin e trëndafilit nga petalet e kësaj luleje. Që atëherë kjo mënyrë e nxjerrjes së këtij uji të çmuar u shpërnda në botën arabe , në pellgun e Mesdheut dhe më gjerë.

Nuk është një rast që varieteti i trëndaifilit më të shtrenjtë për të nxjerrë ujin (përveç esencës) është “damascena”, me origjinë nga Lindja e Mesme, por edhe trëndafili me një qind fletë, është shumë i vlerësuar për parfumin e lehtë dhe të ëmbël.

Uji i trëndafilit përdoret edhe për lëkurën delikate edhe për ato që kanë probleme më të rënda dermatologjike. Perfekt për të pastruar dhe hidratuar lëkurën, në veçanti atë të fytyrës, kjo përbërje është e përdorshme edhe për lëkurat e thata, edhe për ato shumë të ndjeshme.

Në periudhën e verës, uji i trëndafilit i jep një ndjesi freskie dhe mirëmbajtje, si dhe përmirëson irritimet e lëkurës. Duke e përdorur këtë ujë në mëngjes dhe në mbrëmje ka ndikim shumë të madh edhe në heqjen e rrudhave. Uji i trëndafilit ka substanca antioksiduese si vitamina E, vitamina C.

Nëse keni kohë dhe dëshirë ja si ta përgatisni ujin e trëndafilit në shtëpi: mjafton gjysëm kg petale trëndafili (më mirë nëse janë rozë ose të kuqe) , gjysëm litër ujë të destiluar dhe një shishe qelqi të sterilizuar. Vendosni petalet në një tenxhere me ujë të destiluar dhe i zieni.Kur fillon të ziejnë i mbuloni për mos të dalë avulli dhe i lini në zjarr për 15 minuta në temperaturë të ulët; më pas shuani zjarrin i shtojmë disa pika vaji esencial për ta bërë aromën më të fortë dhe e lëmë të pushojë për një orë. E kullojmë dhe e hedhim në një shishe. Uji i trëndafilit mund të ruhet në frigorifer për tre muaj.