Për lëvizjen e lirë të automjeteve dhe këmbësoreve në rrugët primare në kryeqytet

Për lëvizjen e lirë të automjeteve dhe këmbësoreve në rrugët primare në kryeqytet

Policia e Kosovës ka njoftur se është duke vazhduar aksionin policor sipas planit operativ i cili ka filluar të zbatohet nga data 2 shtator në Prishtinë.

Sipas policisë, zbatimi i këtij plani është mirëpritur nga qytetarët dhe ka ndikuar pozitivisht në ngritjen e imazhit të policisë, në reduktimin e numrit të pengesave dhe kundërvajtjeve në trafikun rrugor në kryeqytet.

“Aksioni për lëvizjen e lirë të automjeteve dhe këmbësoreve në rrugët primare në kryeqytet, gjatë kësaj jave është duke u realizuar në orët e pasdites dhe të mbrëmjes, dhe është përqendruar kryesisht në rrugët kryesore në qendër të qytetit, ndërsa ditëve të ardhshme pritet që aktivitetet policore të intensifikohen edhe në pjesë tjera të qytetit, meqenëse po vlerësohet e nevojshme si nga ana e qytetarëve, po ashtu nga vet policia si edhe nga institucionet komunale”, thuhet në një njoftim të policisë.

Policia e Kosovës, përmes kësaj komunikate gjithashtu ka kërkuar nga të gjithë pjesëmarrësit në trafik që t’i respektojnë rregullat e trafikut rrugor, me theks të veçantë kërkon që drejtuesit e automjeteve, veturat e tyre të mos i parkojnë në vende të ndaluara./21Media